Երեկ «Հայկական ժամանակ»-ը հայտնել էր, որ նախօրեին զրուցել է «Փուչիկների» գործով միակ ամբաստանյալ Սերոբ Բոզոյանի ծանոթներից մեկի հետ. նա թերթին պատմել էր, որ ՀՀԿ-ական համերգ-հանրահավաքի կազմակերպիչներին Բոզոյանն զգուշացրել էր փուչիկների վտանգավոր լինելու մասին, բայց կազմակերպիչներն անտեսել են վտանգը:
Այս մասին երեկ «ՀԺ»-ն հարցեր ուղղեց Աժ ՀՀԿ խմբակցության անդամ, ՀՀԿ երիտասարդական կազմակերպության ղեկավար Կտրեն Ավագյանին:
– Պարոն Ավագյան, ասում են, որ մայիսի 4-ի համերգ-հանրահավաքի կազմակերպիչը դուք էիք: Ինչո՞ւ էիք թույլ տվել, որ վտանգավոր փուչիկներ գնեն:
– Ես դրա մասին այնքան եմ պատասխանել ու ուղղակի անիմաստ եմ համարում լրացուցիչ բան ասել: Ես ոչ մի կապ չունեմ փուչիկների ձեռքբերման հետ, ոչ մի կապ չունեմ և չէի էլ կարող ունենալ: Իմ գործը միայն ու միայն մեր երիտասարդական կազմակերպության ապահովումն է:
– Սերոբ Բոզոյանի ծանոթը, որը լավատեղյակ է փուչիկների պատվերի մասին, երեկ մեզ ասել է, որ դրանց պատվիրատուն հենց դուք էիք:
– Հնարավոր չի, հնարավոր չի: Ես բացառում եմ տենց բան: Ուղղակի բացառված բան է: Չի կարող նման բան լինել, որովհետև ես ոչ մի կապ չեմ ունեցել ոչ մի բանի հետ:
– Այդ մարդը ասում է, որ կազմակերպիչներին Բոզոյանը զգուշացրել էր, որ 100 դրամանոց Փուչիկները վտանգավոր են, իսկ 1000 դրամանոցները` անվտանգ, և որ դուք նախընտրել էիք 100 դրամանոցները:
– Ես արդեն ձեզ պատասխանեցի: Հարցերը ոչ ինձ ուղղեք: Ես կապ չունեմ:
– Այդ դեպքում ո՞վ կապ ունի:
– Դուք կարող եք դիմել իրավապահ մարմիններին, գործը հիմա դատարանում է…
– Ես ձեզ եմ հարցնում: Դուք համերգի կազմակերպիչ կուսակցության անդամ եք, ձեզ պատասխանատու չե՞ք զգում տեղի ունեցածի համար:
– Կա կուսակցական կազմակերպչական հանձնաժողով, իրանց զանգեք ու իրանցից ճշտեք:
Նշված հանձնաժողովի ղեկավար Ռուբեն Թադևոսյանը մեր հարցերը լսելուց հետո ասաց, որ իրեն զանգահարենք ավելի ուշ, իսկ ավելի ուշ` մեր հեռախոսազանգերին չպատասխանեց:
