Մեծ Բրիտանիայում հինգշաբթի տեղի կունենան նախնական լսումներ Ալեքսանդր Լիտվինենկոյի մահվան գործով: Ռուսաստանի անվտանգության դաշնային ծառայության նախկին սպան թունավորվել էր 2006 թ. ռադիոակտիվ պոլոնիումով:
Ինչպես հաղորդում է BBC-ն, դատավոր Ռոբերտ Օուենը կորոշի հարցաքննության անցկացման ձևը, մասնավորապես՝ քննարկվե՞ն արդյոք ավելի լայն հարցեր, ինչպես, օրինակ, սպանության դրդապատճառները և պատճառները, Լիտվինենկոյի սպանության համար օգտագործված պոլոնիումի ծագումը:
Բրիտանացի դատախազների խոսքերով՝ իրենք բավարար չափով ապացույցներ ունեն դաշնային ծառայության նախկին գործակալ Անդրեյ Լուգովոյին մեղադրանք ներկայացնելու համար, որին նախկինում Ռուսաստանը հրաժարվում էր հանձնել Լոնդոնին, ինչը հանգեցրեց երկու երկրների միջև հարաբերությունների սառեցմանը: Լուգովոյն այս պահին Պետդումայի անդամ է Լիբերալ- դեմոկրատական կուսակցությունից: Նա հերքում է իր դեմ մեղադրանքները՝ ասելով, թե դրանք քաղաքական ենթատեքստ ունեն:
Մեծ Բրիտանիա փախած Ալեքսեյ Լիտվինենկոն մահացել է 2006 թ. նոյեմբերին՝ նախկին գործընկերների՝ Անդրեյ Լուգովոյի և Դմիտրի Կովտունի հետ հանդիպումից հետո: Մահից հետո նրա օրգանիզմում հայտնաբերվել է ռադիոակտիվ պոլոնիում 210, ընդ որում, պաշտոնական բժշկական եզրակացություն նրա մահվան պատճառների մասին առայժմ չի հրապարակվել:
