«Մենք թույլ չենք տա, որ 30 արծաթով վաճառեն մեր ապագան, ինչպես վաճառեցին մեր պապերի ունեցվածքը, մեր ընդերքը»,- Ժողովրդական կուսակցության հանրահավաքի ժամանակ հայտարարեց «Սարդարապատ» շարժման նախաձեռնող խմբի անդամ Տիգրան Խզմալյանը:
Խզմալյանը նշեց, որ փոփոխությունն իրականացվելու է ուղիղ ժողովրդավարությամբ` ժողովուրդը դուրս է գալիս և ստիպում, որ իրեն լսեն: Խզմալյանի խոսքերով, փոփոխությունները ընտրություններով հնարավոր չէ անել, քանզի ընտրությունները մեր երկրում դարձել են կազինո, իսկ այնտեղ հաղթել հնարավոր չէ.
«Ովքեր հայտարարում են, թե պետք է գնալ հերթական կամ արտահերթ ընտրությունների` կա՛մ միամիտ են, կա՛մ մեղսակից, քանզի իշխանությունները նորից փորձելու են մեզ մտցնել այդ կազինոն և նորից խաբել, որ ևս 5-10 տարով ապահովեն սեփական հարստությունը, իշխանությունը և մարդկանց կեղեքելու ու կողոպտելու հնարավորությունը»:
Խզմալյանը նշեց, որ փետրվարը հայերի համար ծանր ամիս է` Սումգայիթի ողբերգությունների ամիսը: Նրա խոսքերով, ոչ ոք չէր սպասում, որ Երևանը կսումգայիթացնեն. «Սա քաղաքական ձմեռ է, իրենք փորձում են այնպես անել, որ գարունը Հայաստան երկիր չգա: Մենք հավաքվում ենք, որ մարտի մեկից հետո գա մարտի երկուսը, որովհետև տարիներ են անցնում, իսկ մենք անընդհատ մնում ենք Մարտի մեկի արյան, ցավի ու ցասման մեջ»:
Տիգրան Խզմալյանը նաև հավելեց, որ իրենք չեն եկել ԺԿ հանրահավաքին, որ միանան այս կամ այն կուսակցությանը, քանզի կուսակցությունները միայնակ ոչ մի բան չեն կարող անել. «Մենք եկել ենք համախմբելու մեզ և ձեզ, ընդհանուր դիմադրական շարժում կառուցելու. քաղաքացիական անհնազանդությամբ ենք հաղթելու»:
Մեր բոլոր տեսանյութերը կարող եք դիտել «ՏԵսանյութ» բաժնում` http://1in.am/arm/more_mvideo.html
