Իրանի զինվորական ղեկավարությունը խոստովանել է հարևան երկրներ, այդ թվում` Սիրիա, Իսլամական հեղափոխության պահապանների կորպուսի զինծառայողներ ուղարկելու փաստը: Այս մասին հաղորդում է լիբանանյան Naharnet ռեսուրսը` հղում անելով Կորպուսի հրամանատար, ջոկատային գեներալ Մոհամեդ Ալի Ջաֆարիին:
Նրա խոսքով` Կոդս հատուկ ստորաբաժանման զինծառայողների «որոշակի քանակություն» գտնվում է Սիրիայում և Լիբանանում: Գեներալը բացատրել է, որ իրանցի զինվորականները այդ երկրներում են որպես խորհրդատուներ: «Դա չի նշանակում այդ երկրներում Իրանի ռազմական ներկայություն»,- ասել է Ջաֆարին:
Գեներալը նաև հայտարարել է, որ եթե Իրանի դեմ ռազմական արշավ սկսվի, Իսլամական Հանրապետության ղեկավարությունն իրեն իրավունք կվերապահի ագրեսիային պատասխանել` Օրմուզի նեղուցին, ինչպես նաև Բահրեյնում, Քուվեյթում, Սաուդյան Արաբիայում և ԱՄԷ-ում ԱՄՆ-ի բազաներին հարվածներ հասցնելով: Ջաֆարին հիշեցրել է, որ այդ բոլոր օբյեկտները գտնվում են իրանական հրթիռների հնարավորությունների տիրույթում:
2012-ի սեպտեմբերի 6-ին դեպի Սիրիա իրանցի զինծառայողներ ուղարկելու մասին գրել էր բրիտանական The Daily Telegraph-ը: Հղում անելով արևմտյան հետախուզությունների տվյալներին` հրատարակությունը հաղորդել էր, որ Դամասկոսին նման օգնություն տրամադրելու որոշումը Թեհրանը կայացրել էր դեռևս հուլիսին` մահապարտ ահաբեկչի ձեռքով Սիրիայի պաշտպանության նախարարի սպանությունից հետո: Իրանցի զինվորականները երկիր են մեկնել օդանավերով` հարյուրավոր տոննաներ կշռող ռազմական բեռով:
Սիրիայում իսլամական հեղափոխության պահապանների ներկայության մասին տեղեկություններ հայտնվել էին նաև նախկինում, սակայն դրանք պաշտոնապես չէին հաստատվել:
