Լուրերը ԱՄՆ-ի Պետդեպարտամենտի կազմած`ամերիկյան քաղաքացիների համար 7 առավել վտանգավոր երկրների ցանկի մասին, որում ընդգրկված է նաև Հայաստանը, ամբողջական չեն։ «Ազատություն» ռադիոկայանը հայտնում է, որ այդ մասին այսօր ասել է Հայաստանում Միացյալ Նահանգների դեսպան Ջոն Հեֆերնը։
Նրա վկայությամբ`այս պահի դրությամբ արդեն հինգ տասնյակ դեսպանատներ զգուշացրել են ամերիկյան քաղաքացիներին:
Հիշեցնենք, որ երկու օր առաջ իր պաշտոնական կայքէջում նման զգուշացում տեղադրեց նաև Երևանում Միացյալ Նահանգների դեսպանությունը։
Դեռ նախօրեից մամուլում շրջանառվում են լուրեր, թե Պետդեպարտամենտը ամերիկյան քաղաքացիների համար 7 առավել վտանգավոր երկրների ցանկում Բուրունդիի, Քուվեյթի, Սուդանի, Թունիսի, Զամբիայի և Եգիպտոսի հետ ընդգրկելէ նաև Հայաստանը:
Միացյալ Նահանգների միջազգային զարգացման գործակալության կազմակերպած միջոցառման ժամանակ լրագրողների խնդրանքով մեկնաբանելով այս տեղեկությունները` դեսպան Հեֆերնը ասել է. – «Լիբիայում տեղի ունեցած իրադարձությունները, Կահիրեում ԱՄՆ-ի դեսպանատան և Լիբիայում ԱՄՆ-ի հյուպատոսության հետ կապված վերջին իրադարձությունները ցույց են տալիս, որ մեր դեսպանատները ամենուր պետք է զգոնություն ցուցաբերեն: Միացյալ Նահանգների յուրաքանչյուր դեսպան պարտավոր է ամեն ինչ անել ԱՄՆ-ի քաղաքացիների անվտանգությունը ապահովելու համար` անկախ նրանից` այդ երկրում որևէ իրադարձություն եղե՞լ է, թե՞` ոչ»:
Ջոն Հեֆերնը նշել է, որ վերջին ողբերգական իրադարձություններից հետո ԱՄՆ-ի նախագահն ու պետքարտուղարը արդեն իսկ դիմել են իրենց քաղաքացիներին` զգոն լինելու կոչով:
«Սա ամբողջ աշխարհում է կատարվում, և Հայաստանը մեկն է այդ երկրներից: 7 երկրների մասին լուրերը ամբողջական տեղեկություններ չեն: Այս պահի դրությամբ արդեն 50 դեսպանատներ զգուշացրել են իրենց քաղաքացիներին: Հայաստանի հետ կապված որևէ տեղեկատվություն չկա, և Հայաստանի հետ որևէ առնչություն չունի», – ընդգծել է դեսպանը։
Վերջում Ջոն Հեֆերնը նշել է, որ Երևանում ԱՄՆ-ի դեսպանատունը շարունակում է իր բնականոն աշխատանքը:
