Այսօր Անդրանիկ Օզանյանի 146-ամյակն է: ԵՊՀ դասախոսներ Էդիկ Զոհրաբյանը և Աշոտ Ներսիսյանը, լրագրողների հետ հանդիպման ժամանակ խոսելով Անդրանիկի մասին, փաստեցին, որ նա հայ ազատամարտի հայդուկային ուղղության մեծություններից մեկն է:
Զոհրաբյանը մեջբերեց Անդրանիկի խոսքերը` «Յուրաքանչյուր ոք գլուխը բարձին դնելուց պիտի մտածի, թե այդ օրն ինչ է արել իր ժողովրդի համար», և ասաց, որ այս խոսքերը դարձել են մարգարեություն մեր օրերի համար:
Աշոտ Ներսիսյանն էլ նշեց, որ պետք չէ Անդրանիկի գործը ներկայացնել անթերի և շրջապատից կտրելով. «Հայդուկային պայքարում նա հերոս է եղել, բայց արդյունավետության առումով հայդուկային պայքարը ոչ մի բան չտվեց մեր ժողովրդին։ Ես չեմ թերագնահատում Անդրանիկին, նա իր պայքարում մեծություն էր, բայց խնդիրը վերաբերում է արդյունավետությանը»:
Զոհրաբյանն էլ շեշտեց, որ պետք է Անդրանիկի գործունեությունը բաժանել որոշակի փուլերի, քանզի ինքը համաձայն չէ, որ Անդրանիկը միայն հայդուկային շարժման հերոս է:
Այդուամենայնիվ, բանախոսները միակարծիք էին այն փաստի շուրջ, որ հայոց պատմության մեջ Զորավար Անդրանիկի վաստակը մեծ է:
