ԲՀԿ առաջնորդ Գագիկ Ծառուկյանը այսօր եղել է Գյումրիում: Նա մասնակցել է Գյումրու քաղաքապետի պաշտոնում առաջադրված ԲՀԿ-ական Սամվել Բալասանյանի, ով վայելում է նաև ՀՀԿ համակրանքն ու աջակցությունը, կազմակերպած վերջին քարոզարշավին:
Հանդիպումը կայացել է Դրամատիկական թատրոնի շենքի դիմաց, որտեղ հավաքված ժողովրդին դիմելով Գագիկ Ծառուկյանը հայտարարել է. «Իմ կողմից Գյումրի քաղաքին նվիրում եմ 10 աղբատար մեքենա և 10 տրակտոր՝ փողոցները ձյունից մաքրելու համար»:
ԲՀԿ-ականները Երևանից նաև երգիչ-երգչուհիներ էին բերել Գյումրի: Դիմելով հավաքված մարդկանց՝ Սամվել Բալասանյանն իր ելույթում նշել է. «Գյումրիից պետք է հեռացնենք վախի մթնոլորտը, գյումրեցիները թասիբով ժողովուրդ են, նրանք պետք է ազատ քայլեն փողոցներով: Քաղաքը պետք է լուսավորել»:
Նա նաև չի մոռացել շնորհակալություն հայտնել Ծառուկյանին: «Շնորհակալություն եմ հայտնում Գագիկ Ծառուկյանին, ով առաջադրել և պաշտպանում է իմ թեկնածությունը»,- ասել է ՀՀԿ համակրանքը վայելող, Գյումրիի քաղաքապետի թեկնածուն:
Նշենք, որ Գագիկ Ծառուկյանի կողքին տեղ էին զբաղեցրել ԲՀԿ-ական Վարդևան Գրիգորյանն ու ԱԺ պատգամավոր Մարտուն Գրիգորյանը: Ելույթներից հետո ԲՀԿ առաջնորդ Գագիկ Ծառուկյանը արագ հեռացել է՝ չպատասխանելով լրագրողների և հավաքված գյումրեցիների հարցերին:
