Մեր տեղեկություններով, «Մուլտի ագրո» ընկերության ղեկավար Ռոզա Ծառուկյանը՝ «Բարգավաճ Հայաստան» կուսակցության նախագահ Գագիկ Ծառուկյանի մայրը, երեկ գնացել է Սննդի անվտանգության պետական տեսչություն և սպառնացել է տեսչության պետ Աբրահամ Բախչագուլյանին:
Հիշեցնենք, որ երեկ Կառավարության նիստի ժամանակ Ա. Բախչագուլյանը ներկայացրել է, որ կաթնամթերք արտադրող մի քանի այլ ընկերությունների հետ միասին «Մուլտի ագրոյի» արտադրանքում նույնպես հայտնաբերվել են խախտումներ:
Տեսչության լրատվական ծառայության պետի տեղակալ Բաբկեն Պիպոյանը «Առաջին լրատվական»-ի հետ հեռախոսազրույցում ընդամենը հաստատեց, որ տիկին Ծառուկյանը հանդիպել է Ա. Բախչագուլյանի հետ: Ա. Բախչագուլյանն ինքը երեկ չէր պատասխանում մեր հեռախոսազանգերին, որպեսզի մեկնաբանություն խնդրեինք, թե ինչ խոսակցություն է ունեցել Ռ. Ծառուկյանի հետ:
Ի դեպ, այսօր «Հրապարակ» թերթը նույնպես հրապարակել էր, որ Ռ. Ծառուկյանն այցելել է իրենց խմբագրություն և հայտարարել, որ իրենց մոտ խախտումներ չկան այն դեպքում, երբ երեկ Ա. Բախչագուլյանը հայտարարեց, թե մի քանի այլ ընկերությունների հետ միասին «Մուլտի ագրո» ընկերությունում նույնպես խախտումներ են հայտնաբերվել:
