Իզուր չեն ասում, որ Հայաստանի քաղաքացիական հասարակությունը կայացել է, այն պայքարից պայքար դառնում է էլ ավելի հաստատակամ և ազդեցիկ: Այս մասին է վկայում վերջին ամիսներին քաղաքացիական ակտիվիստների գործունեությունը Մաշտոցի պուրակում, Թռչկանի ջրվեժում, Փակ շուկայում, իսկ այսօր նաև` «Հարսնաքար» ռեստորանային համալիրում կատարվածի առնչությամբ: Միգուցե այսօր շատերի համար տարօրինակ լիներ, եթե իր իրավունքների իրացումը պարտադրող հասարակությունն անմասն մնար գալիք ՏԻՄ ընտրություններից:
ՏԻՄ ընտրությունների վերահսկողության նոր մեխանիզմներ են փորձում ներդնել քաղաքացիական նախաձեռնությունների անդամները, ակտիվիստները: Այս մասին «Առաջին լրատվական»-ի հետ զրույցում տեղեկացրեց քաղաքացիական նախաձեռնությունների ակտիվիստ Կարեն Հարությունյանը, ով սեպտեմբերի 9-ին ՏԻՄ ընտրությունների վերահսկողություն է իրականացնելու Գյումրիում:
Կարեն Հարությունյանը կարևորեց ՏԻՄ ընտրությունների արդար ընթացքը` ասելով, որ նախագահական և խորհրդարանական ընտրություններին ընտրակեղծիքներ իրականացվում են տեղական մարմինների ոչ լեգիտիմ ղեկավարների կողմից:
Նա նաև նկատեց, որ ՀՀ-ում ՏԻՄ-ն իր գործառույթները չի իրականացնում, ինքնակառավարում չկա, այս մարմինները կատարում են հրամաններ:
«Եթե տեղական ինքնակառավարման մարմիններն անկախանան, շատ ավելի դժվար կլինի կեղծել նախագահական և խորհրդարանական ընտրությունները: ՏԻՄ-ի անկախացումն էլ ինքնաբերաբար չի լինելու. քաղաքացիական նախաձեռնություններում ներգրավված մարդիկ պետք է աջակցեն այդ գործընթացին: Այս ՏԻՄ ընտրություններին քիչ ժամանակ է մնացել` ընտրությունների վերահսկողության, սեփական թեկնածուների առաջադրման համար: Ստեղծված իրավիճակում, եթե նույնիսկ առաջադրվեն մարդիկ, լուրջ հաջողության չեն կարող հասնել: Պետք է փորձել անկախացնել մարմինը, ներգրավել անկախ մարդկանց»,- մեկնաբանեց քաղաքացիական նախաձեռնությունների ակտիվիստը՝ շարունակելով, որ ակտիվիստները պետք է մասնակցեն ընտրությունների վերահսկման աշխատանքներին և ծրագրված իրականացնեն այդ աշխատանքները:
Ըստ նրա՝ այսօր քաղաքացիական հասարակությունը չունի սեփական թեկնածուներ առաջադրելու ռեսուրսներ բոլոր խնդրահարույց քաղաքներում, գյուղերում: Կարեն Հարությունյանը նաև հավելեց, որ ակտիվիստներից շատերը չեն էլ ցանկանա առաջադրվել, որովհետև քաղաքացիական պայքարը չի ենթադրում իշխանության մաս դառնալ. դա պայքարի սկզբունքներին դեմ է:
Անդրադառնալով արդեն իսկ Գյումրիում մեկնարկած վերահսկողական գործընթացներին՝ նա ասաց, որ Գյումրին է ընտրվել, որովհետև այն ՀՀ երկրորդ մայրաքաղաքն է, այնտեղ ձևավորվել են ընտրական վատ տեխնոլոգիաներ: Գյումրիում ավագանու ընտրություններին մասնակցում են «Քաղաքը մերն է» քաղաքացիական նախաձեռնության անդամները:
«Ավագանին լուրջ լիազորություններ ունի, որոնք փաստացի չեն աշխատում Գյումրիում: Այս տարիների ընթացքում Գյումրիին վերաբերող ոչ մի որոշմանը գործող ավագանու անդամներից որևէ մեկը դեմ չի քվեարկել: Այսօր այդ մարմինն անպետք է Գյումրիում:
Գյումրիում պլանավորել են որոշակի ծրագրեր իրականացնել, պարզապես ժամանակն էր քիչ, չգիտեմ` նպատակն ինչքանով կհաջողվի իրականացնել, բայց վերահսկողություն ենք իրականացնելու ոչ թե ուղղակի լրագրողական ավանդական ձևերով, այլ այնպիսի մեթոդներով, որ հասարակության շրջանում վերաարժևորվեն այս ընտրությունները»,- ասաց Կարեն Հարությունյանը՝ հավելելով, որ Գյումրիում ՏԻՄ ընտրությունների վերահսկողության նպատակն է աշխատել հիմնականում դրսում, ոչ թե տեղամասերում, որովհետև խախտումները հիմնականում իրականացվում են տեղամասերից դուրս: Քաղաքացիական ակտիվիստի խոսքով՝ ուզում են նոր որակներ մտցնել և հասարակության շրջանում արթնացնել ընտրությունների նկատմամբ հավատը:
