Ինչպես ավելի վաղ տեղեկացրել էր «Առաջին լրատվական»-ը, Գյումրիում սեպտեմբերի 3-ին տեղի էր ունեցել դանակահարության դեպք: Հիշեցնենք, որ սեպտեմբերի 3-ին Գյումրու Գալուստ Գյուլբենկյանի անվան վիրաբուժական հիվանդանոց էր դիմել 1993 թվականին ծնված Արամ Աշոտի Հարությունյանը` դանակահարված վիճակում:
«Առաջին լրատվական»-ի տեղեկություններով՝ դանակահարությունը տեղի է ունեցել աղջկա «պատճառով»: Մեր ունեցած տեղեկություններով՝ երկու երիտասարդներ վիճաբանել են աղջկա համար, ծեծել իրար Անի թաղամասում, ապա պայմանավորվել և հանդիպել Տնտեսագիտական համալսարանի Գյումրու մասնաճյուղի դիմաց:
Ինչպես «Առաջին լրատվական»-ի թղթակցի հետ զրույցում նշեց համալսարանի տնօրեն Սամսոն Դավոյանը միջադեպը տեղի է ունեցել համալսարանի բակում: «Դանակահարված երիտասարդը սովորում է մեր բուհում, սակայն դեպքի օրը նա դասի նստած չի եղել, դեպքն էլ տեղի է ունեցել դասամիջոցին»,- նշեց Սամսոն Դավոյանը:
Նշենք, որ Շիրակի ոստիկանապետ Կարեն Բաբակեխյանը հրաժարվել էր դեպքի վերաբերյալ պարզաբանումներ տալ: Իսկ ոստիկանության հասարակայնության և լրատվության բաժնից «Առաջին լրատվական»-ին հայտնել էին, որ մանրամասները կհաղորդեն ավելի ուշ, սակայն երկու օր է մեզ չի հաջողվում ոստիկանությունից տեղեկություններ ստանալ: Լրատվության եւ հասարակայնության բաժնի պետ Աշոտ Ահարոնյանը մեր հեռախոսազանգերին այսօր ես չպատասխանեց:
