ԱՄՆ Հյուսիսային Կարոլինա նահանգի Շարլոտ քաղաքում այսօրվանից մեկնարկում է և մինչև սեպտեմբերի 6-ը կշարունակվի ԱՄՆ֊ի Դեմոկրատական կուսակցության համագումարը:
Համագումարի հիմնական միջոցառումները կանցկացվեն վաղը, քանի որ ֆորումի առաջին օրը համընկել է տոնի` Աշխատանքի օրվա հետ:
Միջոցառմանը կուսակցականները պաշտոնապես կաջակցեն վերընտրվել ցանկացող, գործող նախագահ Բարաք Օբամայի և փոխնախագահ Ջո Բայդենի թեկնածությանը: Համագումարին նրանք երկուսն էլ ելույթ կունենան: Ֆորումին սպասվում են այլ դեմոկրատ քաղաքական գործիչների` ԱՄՆ նախկին նախագահ Բիլ Քլինթոնի, Ներկայացուցչների պալատի նախկին խոսնակ Նենսի Փելոսիի, Սան Անտոնիո և Չիկագո քաղաքների քաղաքապետեր Ջուլիան Կաստրոյի, Ռամ Էմանուելի և այլոց ելույթները:
Շարլոտում անցկացվող Դեմոկրատների համագումարին, որում պաշտոնապես նախագահի պաշտոնում առաջադրվելու է Բարաք Օբաման, Հայաստանից մասնակցում են Դավիթ Շահնազարյանը և «Ազատ դեմոկրատներ» կուսակցության նախագահ Խաչատուր Քոքոբելյանը։
Հայտնի է, որ հարևան Վրաստանից միջոցառմանը մասնակցում է Վրաստանի խորհրդարանի խոսնակ Դավիթ Բաքրաձեն, ով այսօր առավոտյան մեկնել է ԱՄՆ:
