Երևանի քաղաքապետ Կարեն Կարապետյանի և մոսկովյան «Տրոյկա Դիալոգ» ընկերության նախագահ Ռուբեն Վարդանյանի նախաձեռնության համաձայն, փետրվարի 20-ին մոսկովյան «Սկոլկովո» կառավարման դպրոցի ներկայացուցիչները ճանաչողական հանդիպում-քննարկում էին կազմակերպել քաղաքապետարանի աշխատակազմի հետ:
Հանդիպման ընթացքում հյուրերը ներկայացրել են քաղաքների զարգացման ներկայիս չափորոշիչները, քաղաքաշինական ժամանակակից մոդելները և քաղաքների մշակույթը ճանաչելի դարձնելու ընդունված միտումները:
Քննարկման հիմնական բանախոս «Տրոյկա Դիալոգ» ընկերության գործադիր տնօրեն Գոռ Նահապետյանը նախ և առաջ կարևորել է Երևանի ներկայիս այն մեծ ներուժը, որը հնարավորություն կընձեռի մայրաքաղաքը տեղացիների համար առավել հարմարավետ, իսկ օտարերկրացիների ու ներդրողների համար գրավիչ դարձնել: Այս համատեքստում ներկայացվել են աշխարհի որոշ քաղաքների ենթակառուցվածքային հարմարավետության տարբերակները, որոնք ըստ էության կիրառելի կարող են լինել նաև Երևանում:
Հանդիպման ավարտին Երևանի քաղաքապետ Կարեն Կարապետյանն ընդգծել է. «Մեր թիվ մեկ խնդիրն այսօր Երևանն ավանդույթներով ու շեշտադրումներով քաղաք դարձնելն է` պահպանելով երևանցիների հարմարավետությունը»: Բացի այդ, նաև հավելել է, որ ցանկացած առաջադեմ փորձի փոխանակման հարցում քաղաքապետարանը բաց և պատրաստակամ է համագործակցության համար:
Երևանի քաղաքապետարան
