Այսօր հրավիրված հանրահավաքում ՀԱԿ համակարգող Լևոն Զուրաբյանը ելույթում նկատեց, որ բազմահազարանով հանրահավաքը ապացուցում է, որ հասարակությունը նորից ոտքի է կանգնում, և որ գործող ռեժիմը մոտենում է իր վախճանին:
«Բոլոր նախադրյալները կան պնդելու, որ նրա հարատևման բոլոր ռեսուրսները սպառվում են», նկատեց նա` հավելելով, որ միջազգային հանրությունը սկսում է հասկանալ, որ անիմաստ է ֆինանսապես և տնտեսապես միջոցներ տրամադրել կոռումպացված օլիգարխիկ ռեժիմին, քանի որ դա նպաստում է իշխանությունների հարստացմանը:
«Ռեժիմի տապալումների պատճառով հավանական է դառնում պատերազմի վերսկսումը, և մեզ հասած տեղեկություններով, իշխանությունները լրջորեն քննարկում են, թե ինչպես տնտեսական կոլապսը և հնարավոր պատերազմում պարտությունը վերագրեն ընդդիմության կողմից երկրում ստեղծված քաոսին: Նման իշխանության` իրեն հարգող որևէ ազգ իրավունք չունի հանդուրժելու:
Ուրեմն մեր գլխավոր նապատակն է օր առաջ ազատվել այս կործանարար ռեժիմից: Միակ հարցը հետևյալն է` արդյո՞ք ժողովրդավարական հեղափոխությունը հնարավոր է անել թավշյա եղանակով` առանց արյունահեղության, պետական կառավարաման համակարգի կազմալուծման, կարգուկանոնի և ռազմաճակատում մեր դիրքերի քայքայման: Սա է հարցը: ՀԱԿ-ը համոզված է, որ դա հնարավոր է: Մենք կարող ենք ստեղծել այնպիսի համաժողովրդական ընդվզում, որ 100 հազարավոր մարդիկ դուրս գան փողոցներ և հողը այրվի, նաև`փողը այրվի այս իշխանությունների ոտքերի տակ»,- ասեց Զուրաբյանը:
Ամփոփելով ելույթը՝ ՀԱԿ համակարգողը նշեց. «Եթե առաջիկա 1–2 ամիսների ընթացքում Հայաստանի իշխանությունները համաժողովրդական շարժման սահուն ճնշման տակ չգնան Կոնգրեսի հայտնի քաղաքական պահանջների բավարարման ուղղությամբ, ապա նրանք իրենց ձեռքով բացելու են ժողովրդի ցասման ճանապարհը, ինչպես դա եղավ Եգիպտոսում և Թունիսում»:
