Այսօր` օգոստոսի 8-ին, Pussy Riot փանք խմբի մասնակիցները, որոնք մեղադրվում են խուլիգանական գործողությունների մեջ, վերջին խոսքով ելույթ կունենան դատարանի առաջ, ինչից անմիջապես հետո դատարանը կհեռանա` դատավճիռ կայացնելու:
Նախօրեին պետական մեղադրողը փանք խմբի անդամների համար պահանջել է երեք տարվա ազատազրկում: Դատախազության աշխատակցի պնդմամբ` աղջիկները մեծ վիրավորանք են հասցրել ուղղափառ հավատացյալներին:
Նրա կարծիքով` աղջիկներին կարող է ուղղել միայն երեքամյա կալանքը:
Երեկ` վերջին դատալսման ժամանակ, խմբի անդամներից Նադեժդա Տոլկոնիկովան հայտարարել է, որ իր և իր գործընկերների ելույթը քաղաքական բնույթ էր կրում: Նա բողոքել է, որ ընդդիմախոսները չեն ցանկանում լսել իրենց:
Նրանց պաշտպանությամբ հանդես է եկել Ջոն Լենոնի այրին` Յոկո Օնոն: Նա Twitter-ի իր էջում դիմել է Պուտինին: «Բանտերում ազատ տեղեր թողեք նրանց համար, ովքեր իրոք մեղավոր են»,- գրել է Յոկո Օնոն:
