Ինչպես արդեն տեղեկացրել ենք` Curiosity սարքը ութամսյա թռիչքից հետո բարեհաջող վայրէջք է կատարել Մարսի վրա, եւ առաջին ազդակներն արդեն ստացել է Երկիր մոլորակը։
NASA-ում սա համարում են ամենաբարդ տիեզերական թռիչքը։ Թռիչքների հարցերը կարգավորող ստորաբաժանումը Curiosity-ի բարեհաջող վայրէջքն ընդունել է ծափահարություններով եւ նույնիսկ արցունքներով։ Եթե այս փորձը ձախողվեր, NASA-ն կանգնելու էր լուրջ խնդիրների առջեւ։ Արդեն իսկ կրճատվել է գործակալության ֆինասնավորումը։
2.5 միլիարդ դոլար արժողությամբ սարքի միջոցով առաջիկա երկու տարիներին գիտնականները փորձելու են, ի վերջո, հստակ եւ վերջնական պատասխան տալ հարցին` արդյոք Մարսի վրա կյանքը հնարավո՞ր է, կա՞ն այնտեղ արդյոք կյանքի հետքեր։
Միացյալ Նահանգների տիեզերական հետազոտությունների գործակալության` NASA-ի ղեկավար Չարլզ Բոլդենը լրագրողների հետ հանդիպման ժամանակ ասել էր. – «Հիմա, հենց հիմա Curiosity սարքն ընթանում է՝ մարդկային հետքեր փնտրելու։ Curiosity-ն` ամենաիմաստուն սարքը, որ եղել է երբեւէ, հիմա կարմիր մոլորակի վրա է եւ պետք է տա տարիների հարցի պատասխանը՝ երբեւիցե եղե՞լ է կյանք Մարս մոլորակի վրա»։
Մարսի վրա կյանքի վերաբերյալ հարցերի տարափին ի պատասխան` Բոլդենն ասել է՝ մեքենայացված մոլորակում ոչ մի հետազոտություն դժվար չէ։ Հետո էլ ավելացրել է. – «Ես գիտեմ` ձեզանից շատերն ասում են` ինչպե՞ս կարող է նա այդպես հեշտ խոսել։ Հավատացե՛ք ինձ»։
