Նախկին խորհրդարանական Վարդան Բոստանջյանը վստահ է, որ Գյումրու քաղաքապետի ընտրություններին հաղթանակ տանելու դեպքում ԲՀԿ պատգամավոր Սամվել Բալասանյանը լավ քաղաքապետ կլինի: Այս մասին նա ասաց «Առաջին լրատվական»-ի հետ զրույցում:
«Որքանով որ ես Բալասանյանին ճանաչում եմ (իսկ ես նրան լավ եմ ճանաչում), նա իր շրջապատի մարդկանց նկատմամբ ուշադիր է: Դա չի կարելի ուրանալ: Սամվել Բալասանյանը նախաձեռնությունների առումով ևս Ազգային ժողովում երբեք անմասն չի եղել»,- նկատեց Վարդան Բոստանջյանը:
ԱԺ նախկին պատգամավորի խոսքով՝ Բալասանյանը գյումրեցիների կողմից ընդունված անհատականություն է: «Եթե մարդն իր քայլերով նպաստում է շրջապատի բարեկեցության մակարդակի բարձրացմանը, աշխատատեղեր է հիմնում, նման անձանց հետ շփումները միշտ էլ լավ են ստացվում»,- ասաց Բոստանջյանը:
Հարցին, թե Գյումրին`քաղաքապետի հավանական թեկնածու Սամվել Բալասանյանի գլխավորությամբ ո՞ւմ կսատարի հաջորդ տարի կայանալիք նախագահական ընտրություններին, Վարդան Բոստանջյանը պատասխանեց. «Եկեք սպասենք, մինչև այդ պահը մոտենա: Կարծում եմ`ամեն ինչ կլինի այնպես, ինչպես որ ընդհանուր որոշում կկայացվի»:
Հիշեցնենք` ՀՀԿ Շիրակի տարածքային կազմակերպության ղեկավար, քաղաքապետ Վարդան Ղուկասյանը հրաժարական էր տվել հուլիսի 21-ին:
