Մի քանի օր առաջ հայտնի դարձավ քաղաքապետ Տարոն Մարգարյանի պարզաբանումը Աբովյան փողոցում իրականացվող շինարարության վերաբերյալ: Ի պատասխան մի շարք բնապահպանների մտահոգությունների, թե Աբովյան փողոցից ապամոնտաժված կրպակների տեղում սրճարան է կառուցվում, նա ասել էր, որ կառուցվում է ստորգետնյա հանրային զուգարան: «Առաջին լրատվական»-ի հետ զրույցում Երևանի քաղաքապետարանի հասարակայնության հետ կապերի և լրատվության բաժնի պետ Արթուր Գևորգյանն ասաց, որ ստորգետնյա զուգարանի կառուցման աշխատանքներն արագացված ընթացքի մեջ են:
Նա նշեց, որ քաղաքում հանրային զուգարանների սակավության հարցը մշտապես բարձրացվել է՝ և՛ քաղաքացիների, և՛ օտարերկրյա զբոսաշրջիկների, և՛ տուրիստական գործակալությունների կողմից: Ըստ նրա` այս հարցը կարող է որոշ չափով լուծվել ստորգետնյա զուգարանների համակարգի ներդրման դեպքում, որն աշխարհում փորձված տարբերակ է, խորհրդային տարիներին ևս եղել են:
«Ստորգետնյան փողոցի վրա քիչ երևացող է, այս տեսանկյունից սա ավելի արդարացված է: Սա մասնավորն է անում, ուստի զուգարանի սանիտարահիգիենիկ պայմանների պահպանումն էլ, բնականաբար, մասնավորի վրա կլինի, որը մեր փորձով կարող եմ ասել, որ ավելի արդյունավետ է: Աբովյան փողոցի այն հատվածում, որտեղ լինելու է հանրային ստորգետնյա զուգարան, նախկինում կար զուգարան, այսօր եղածն է վերանորոգվում՝ հարևանությամբ գտնվող մասնավոր բիզնեսի տիրոջ նախաձեռնությամբ և քաղաքապետարանի թույլտվությամբ: Դա շահույթ հետապնդող նախաձեռնություն է»,- մեկնաբանեց Արթուր Գևորգյանը` հավելելով, որ ցանկացած պետական կառույց` քաղաքապետարան, համայնքային կառույց շահույթ չհետապնդող կառույցներ են, ուստի շահույթ հետապնդելը մասնավորի բացարձակ իրավունքն է, ինչը ենթադրում է գումար վաստակել:
Արթուր Գևորգյանի փոխանցմամբ` քաղաքապետարանը քանիցս հայտարարել է, որ բաց է համագործակցության համար. «Պատրաստ ենք համագործակցել մասնավոր ընկերությունների հետ և քննարկել նման տեղերի հատկացումը: Այս պահին այլ առաջարկներ չկան, բայց ցանկացած առաջարկ, որը կհնչի, կքննարկենք, եթե խելամիտ լուծումներ լինեն: Նաև, ինչո՞ւ ոչ, շարժական զուգարանների հարցում, դրան ևս պատրաստ ենք: Բանուկ հատվածներում կարող են տեղադրվել շարժական հանրային զուգարաններ, դա ևս ընդունված է մարդաշատ վայրերում` այգիներում, պուրակներում: Քաղաքը չէ, որ իր բյուջեից դա պետք է հատկացնի, դա մասնավոր բիզնես է և մասնավորի հետաքրքրության դաշտում է»:
