Այս տարի առաջին անգամ ՀՀ կրթության և գիտության նախարարությունը կազմակերպել է Համահայկական բնագիտական օլիմպիադա` «Ֆիզիկա», «Մաթեմատիկա» և «Ինֆորմատիկա» առարկաների գծով: Համահայկական բնագիտական օլիմպիադայի անցկացման նպատակն է խրախուսել բնագիտական առարկաների նկատմամբ հետաքրքրությունը, Սփյուռքում և Հայաստանում հայտնաբերել տաղանդավոր պատանիներ, ինչպես նաև ընդլայնել Սփյուռքի հետ տարվող աշխատանքների սահմանները:
Համահայկական օլիմպիադայի մասնակիցներին ողջունել և արգասաբեր աշխատանք է մաղթել ՀՀ կրթության և գիտության նախարար Արմեն Աշոտյանը, ով, մասնավորապես, նշել է.”Անցյալ տարի երկրի Նախագահի հետ հանդիպման ընթացքում համահայկական հայագիտական օլիմպիադայի մասնակիցներից մեկը խնդրանք-առաջարկ ուղղեց Նախագահին` հայագիտականից զատ համահայկական օլիմպիադա կազմակերպել նաև այլ առարկաների գծով. մեկ տարի անց երկրի Նախագահի աջակցությամբ այդ աղջնակի խնդրանքը դարձավ իրականություն:
Համահայկական բնագիտական օլիմպիադայի անցկացումը մի մեծ գործընթացի սկիզբ է, որը բերելու է կրթական համահայկական նոր ավանդույթի ձևավորման. երկու տարին մեկ անցկացվող համահայկական փառատոններն այսուհետ կընդլայնեն իրենց առարկայացանկը` ավելացնելով նաև քիմիա և կենսաբանություն առարկաների մրցույթները:
Կրկին ողջունում եմ օլիմպիադայի բոլոր մասնակիցներին, ովքեր, մրցելով իրենց գիտելիքներով, ապացուցում են, որ պայծառ է հայ միտքը, բաբախում է հայ երիտասարդ սերնդի ինտելեկտուալ կարողությունը: Շնորհակալություն ձեզ` նվիրվածության համար, հավատ առ գիտելիք, սեր առ հայրենիք: Վստահեցնում եմ, Հայաստանի կառավարությունը շարունակելու է հետևողական քայլեր ձեռնարկել թե’ մեր երկրում կրթության որակի բարելավման, թե’ Հայաստան-Սփյուռք-Արցախ եռամիասնության մեջ կրթական ոլորտի ծրագրերն առաջնահերթություն դիտարկելու տեսանկյունից»:
Օլիմպիադայի մասնակիցներին իր օրհնությունն է հղել Սուրբ էջմիածնի Քրիստոնեական դաստիարակության կենտրոնի տնօրեն Տեր Վարդան աբեղա Նավասարդյանը:
Առաջին բնագիտական օլիմպիադային, բացի Հայաստանից և Արցախից, մասնակցում են 5 երկրի 8 համայնքի (Ռուսաստան, Էստոնիա, Իրան, Սիրիա, Ֆրանսիա, Վրաստան) ներկայացուցիչներ: Օլիմպիադան անցկացվում է երեք փուլով` նախապատրաստական և երկու մրցութային: Նախապատրաստական և առաջին մրցութային փուլերն անցկացվել են հեռավար կարգով:
Նախապատրաստական փուլում օլիմպիադայի կազմակերպիչները www.olymp.am կայքում 2 անգամ հրապարակել են առաջադրանքներ և խնդիրներ` առաջարկելով աշակերտներին` երկու շաբաթվա ընթացքում աշխատել դրանց լուծման ուղղությամբ:
Առաջին փուլում մրցութային առաջադրանքներն ուղարկվել են կազմակերպիչ-համադրողներին, ովքեր սահմանված ժամկետում կազմակերպել են մրցույթը և փոխանցել հաղթող մասնակիցների ցուցակը: Երկրորդ մրցութային փուլը կազմակերպվում է Հայաստանում, որին մասնակցում են առաջին փուլի հաղթողները:
Օլիմպիադան կտևի մեկ շաբաթ. փակման արարողությունը կկայանա հուլիսի 27-ին:
Լուսանկարը՝ PanARMENIANPhoto-ի
