ԱՄՆ նախագահ Բարաք Օբաման այցելել է Կոլորադո նահանգ և հանդիպել Ավրորա քաղաքի կինոթատրոնում ողբերգական միջադեպի հետևանքով զոհվածների ընտանիքներին: Հինգշաբթի երեկոյան Բեթմենի մասին հերթական ֆիլմի պրեմիերայի ժամանակ մոլագարը սպանել էր 12 մարդու, տուժել էր 58 մարդ: Այս մասին տեղեկացնում է RBK-ն:
Իր ելույթի ժամանակ Սպիտակ տան ղեկավարը Կոլորադոյի բնակիչներին հայտնել է, որ իրենց դիմում է ոչ թե որպես նախագահ, այլ ինչպես հայր և ամուսին: Կինոթատրոնում տեղի ունեցած հարձակումը նա անվանել է դաժան գործողություն:
«Այս մթությունից հետո անպայման լուսավոր օրեր կգան»,- խոստացել է ԱՄՆ նախագահը:
Իր հերթին Ավրորա քաղաքի քաղաքապետ Սթիվ Հոգանը մինչ Օբամայի ելույթը հայտարարել է, որ նախագահի այցելությունը կավելացնի քաղաքացիների լավատեսությունը:
Ավելի վաղ Օբաման քաղաքացիներին կոչ էր արել աջակցել զոհվածների հարազատներին: «Մենք պետք է աջակցենք նրանց և ցույց տանք, որ մենք բոլորս նրանց կողքին ենք»,- ասել էր նա:
«Մութ ասպետ. լեգենդի վերածնունդ» ֆիլմի պրեմիերայի ժամանակ զանգվածային սպանդն իրականացրել էր 24-ամյա ասպիրանտ-նյարդակենսաբան Ջեյմս Հոլմսը: Տղամարդը նախ` արցունքաբեր գազով նռնակներ էր նետել, որից հետո հանդիսատեսի վրա կրակ բացել:
