Ֆոտոլրագրող Գագիկ Շամշյանը News.armeniatv.com-ին հայտնել է, որ Արմավիրի մարզի ընդհանուր իրավասության դատարանի դատավոր Արամ Հովսեփյանը դռնփակ դատական նիստն անցկացնելուց և խորհրդակցական սենյակից վերադառնալուց հետո բավարարեց Արմավիրի մարզի քննչական բաժնի ավագ քննիչ Արմեն Դալլաքյանի միջնորդությունը՝ ԱԺ պատգամավոր Նահապետ Գևորգյանի որդու՝ Արտակ Գևորգյանի նկատմամբ որպես խափանման միջոց կիրառել երկամսյա կալանքը, ինչից հետո վերջինս տեղափոխվել է «Վարդաշեն» քրեակատարողական հիմնարկ:
Մանրամասները՝ ստորև.
Այսօր՝ հուլիսի 21-ին, Ոստիկանության Արմավիրի բաժնի ձերբակալվածների պահման վայրից Արմավիրի մարզի ընդհանուր իրավասության դատարան է տեղափոխվել 30-ամյա Արտակ Գևորգյանը:
Ինչպես Արմավիրից News.armeniatv.com -ին հայտնել է ֆոտոլրագրող Գագիկ Շամշյանը, Ա. Գևորգյանը ԱԺ պատգամավոր Նահապետ Գևորգյանի («Արմավիրցի Նովո») որդին է:
Պատգամավորի որդին դատարան է տեղափոխվել ոստիկանների ուղեկցությամբ՝ ձեռնաշղթայված վիճակով: Այս պահին նշված դատարանի թիվ 3 դահլիճում սկսվել է դռնփակ դատական նիստը, որտեղ Ոստիկանության քննչական գլխավոր վարչության Արմավիրի մարզի քննչական բաժնի ավագ քննիչ Արմեն Դալլաքյանը միջնորդություն է ներկայացրել, որպեսզի դատարանը որպես խափանման միջոց՝ 2-ամսյա կալանք կիրառի ձերբակալված Ա. Գևորգյանի նկատմամբ:
Դատավոր Արամ Հովսեփյանը դռնփակ դատական նիստ է անցկացրել, որը նշանակվել էր ժամը 10-ին, սակայն Ա. Գևորգյանի փաստաբանը ուշանում էր դատական նիստից:
Գ. Շամշյանը հայտնել է, որ Ա. Գևորգյանին մեղադրանք է առաջադրվել ՀՀ Քրեական օրենսգրքի 183 հոդված 1-ին մաս (ավտոմեքենայի կամ տրանսպորտային այլ միջոցին ապօրինաբար տիրանալը, փախցնելը՝ առանց հափշտակելու նպատակի) և նույն հոդվածի 3-րդ մասի 3-րդ կետի (կատարվել է կյանքի կամ առողջության համար վտանգավոր բռնություն գործադրելով կամ դա գործադրելու սպառնալիքով), ինչպես նաև 235 հոդվածի (ապօրինի կերպով զենք-զինամթերք պահելը, կրելը, օգտագործելը) հատկանիշներով:
Ֆոտոլրագրողը նաև հայտնել է, որ Ոստիկանության Արմավիրի բաժնի հատուկ պահպանման տարածք է տեղափոխվել նաև «Մերսեդես Ջի» մակնիշի 005 ՕՕ 05 համարանիշի և նրա կողմից առևանգված «Վազ 2106», և «ԳԱԶ 24» մակնիշի ավտոմեքենաները:
Լուսանկարները՝ Գագիկ Շամշյանի
