Թուրքական Sabah թերթի փոխանցմամբ՝ հունիսի 22-ին Միջերկրական ծովում թուրքական F-4 Phantom ինքնաթիռի կործանումից հետո Թուրքիայի ղեկավարությունը միայն վերջին պահին է հրաժարվել Սիրիային օդային հարված հասցնելուց:
Թուրքիայի ղեկավարությունը մտադրվել էր ավիահարվածներ հասցնել Սիրիայի հակաօդային պաշտպանության (ՀՕՊ) օբյեկտներին՝ ի պատասխան Սիրիայի կողմից իրենց ինքնաթիռի կործանման: Այդ նպատակով անգամ Ինջիրլիքի ավիաբազայից օդ են բարձրացվել մի քանի F-16 ինքնաթիռներ, որոնց տրվել է «Պատրա՛ստ եղեք գործելու» հրամանը:
Սակայն վերջին պահին այդ օպերացիան հետաձգվել է, «հարվածի՛ր» հրամանը չի արձակվել: Դա տեղի է ունեցել այն բանից հետո, երբ հուլիսի 5-ին հայտնաբերվել են կործանված թուրքական ինքնաթիռի օդաչուների դիակները, քանի որ բոլոր կուսակցությունները և Էրդողանը նախևառաջ կարևորում էին թուրք օդաչուներին փրկելը:
Ընդհանուր առմամբ, Սիրիային հարված հասցնելուց Թուրքիայի հրաժարվելու հարցում դեր են խաղացել երեք ծանրակշիռ գործոններ: Դրանցից մեկն այն է, որ թուրքական կողմը քիչ է ծանոթ եղել Սիրիայի սպառազինության տակ առկա ռուսական ՀՕՊ համակարգերին:
Երկրորդ պատճառն այն է, որ թուրքական կողմը հստակ տեղյակ չի եղել, թե ինչ եղանակով է վայր գցվել իր ինքնաթիռը: Ավիահարվածից ամենավերջին պահին հրաժարվելու երրորդ և ամենակարևոր պատճառներից մեկը դրա քաղաքական հետևանքներն են, քաղաքական ռիսկն ու արաբական աշխարհի զայրույթը չհարուցելու ցանկությունը: «Արաբական գարուն» վերապրած երկրները Թուրքիան դիտարկում են որպես «մոդել երկիր», և Սիրիային հարվածելը բացասաբար կանդրադառնար Թուրքիայի իմիջի վրա:
