Այսօր ԵՄ խորհրդատվական խումբն էկոնոմիկայի նախարարության հետ համատեղ կազմակերպել է սեմինար՝ նվիրված ԵՄ և Հայաստանի միջև խոր և համապարփակ ազատ առևտրի գոտու ձևավորման շուրջ բանակցային գործընթացի մարտահրավերներին ու վերջինիս ընձեռած հնարավորություններին: Սեմինարի մասնակիցներին ողջունեցին ՀՀ-ում ԵՄ պատվիրակության ներկայացուցիչ Օննո Սիմոնսը և ՀՀ էկոնոմիկայի նախարար Տիգրան Դավթյանը:
Ըստ Տ. Դավթյանի՝ Հայաստանի և ԵՄ միջև ազատ առևտրի գոտու մասին պայմանագիրը կկնքվի 2-3 տարվա ընթացքում: Այժմ կա մոտավոր պատկերը, թե ինչի մասին է խոսվելու համաձայնագրերում, որոնց տեքստերի նախագծերի վրա ներկայումս աշխատում են: ԽՀԱԱՀ-ի արդյունքում՝ վերացվելու է ոչ սակագնային խոչընդոտների մեծ մասը՝ ԵՄ ներքին շուկային համահունչ ԵՄ կանոնակարգերի և ստանդարտների որդեգրման և ներդրման միջոցով:
Էկոնոմիկայի փոխանխարար Գարեգին Մելքոնյանը հայտնեց, որ մինչև այս տարվա վերջը 2 բանակցային փուլ կլինի՝ հոկտեմբերին և դեկտեմբերին: «Սակայն արագությունը չպետք է ազդի բանակցությունների խորության վրա»,- շեշտեց Գ. Մելքոնյանը։
Համաձայնագիրը բաղկացած է լիելու 15 գլխից: Եվրոպական օրենսդրությանը պետք է մոտարկվեն մրցակցային օրենսդրությունը, շատ կարևորվում է մաքսային հատվածը՝ օրենսդրությունը և ընթացակարգերը: Մյուս ուղղությունները մտավոր սեփականության պաշտպանությունն է, պետական գնումները, ծագման կանոնները, սանիտարիայի և բուսասատնիտայի ոլորտները և այլն:
