Սիրիայի իշխանությունները հինգշաբթի օրը տանկեր և ռազմական տեխնիկա են մտցրել Դամասկոսի շրաջններից մեկը, որտեղ արդեն հինգերորդ օրն է, ինչ շրաունակվում են մարտերն ընդդիմության և կառավարական զորքերի միջև: Այս մասին հաղորդել է Agnece France-Presse-ը` վկայակոչելով Լոնդոնում տեղակայված «Մարդու իրավունքների պաշտպանության մոնիտորինգի սիրիական կենտրոնի» (OSDH) հաղորդագրությունը:
OSDH-ի ղեկավար Ռամի Աբդուռահմանը գործակալությանը հայտնել է, որ ավելի քան 15 տանկեր ներխուժել են Դամասկոսի արևելքում գտվող Քաբուն շրջանի գլխավոր փողոց: Նրա փոխանցմամբ` մտավախություն կա, որ թաղամասում կարող է սպանդ կազմակերպվել:
Արևմտյան ԶԼՄ-ները պարբերաբար հրապարակում են OSDH-ի տվյալները: Մինչդեռ Ռուսաստանի ԱԳՆ-ն խիստ կասկածելի է համարում նրանց տրամադրած տեղեկությունը: Գերատեսչության տվյալներով՝ այնտեղ աշխատում է ընդամենը երկու մարդ՝ ղեկավարը և քարտուղար-թարգմանիչը, իսկ կազմակերպությունը գլխավորող Ռամի Աբդուռահմանը նույնիսկ լիարժեք միջնակարգ կրթություն չունի:
