Այսօր Ասկերանի մշակույթի տանը տեղակայված ընտրատեղամասում քվեարկությանը մասնակցեց ԼՂՀ նախագահի թեկնածու Վիտալի Բալասանյանը:
«Քվեարկեցի հանուն Արցախի ապագայի, հանուն մեր անկախության և հանուն մեր գերնպատակի` մեկ հայկական հանրապետության համար»,- քվեարկությունից հետո լրագրողների հետ զրույցում ասաց Վիտալի Բալասանյանը: Հարցին՝ ի՞նչ ակնկալիքներ ունի ընտրություններից, նա պատասխանեց, թե համոզված է, որ բոլորս միասին մեր մեջ ուժ կգտնենք և կանենք այնպես, որ Ղարաբաղի իմիջն ավելի բարձրանա:
Ըստ Վիտալի Բալասանյանի՝ Արցախի առաջնահերթ խնդիրների դասին է պատկանում սառեցված պատերազմի հարցը, որը հրատապ պետք է ավարտել: Կարևոր խնդիր է նաև Ղարաբաղի՝ բանակցային գործընթացին մասնակցելու հարցը, այնուհետև դրան հաջորդում են սոցիալ-տնտեսական հարցերը:
Հարցին՝ ընտրվելու դեպքում ո՞րն է լինելու իր առաջին քայլը, Վիտալի Բալասանյանը պատասխանեց,- «Նախ ես կհայտարարեմ, որ բոլորի նախագահն եմ, ընդհանրապես որևէ հետապնդումներ չեն լինելու՝ անկախ մարդկանց հայացքներից և կուսակցական պատկանելությունից: Ես կլինեմ բոլորի նախագահը»: Բալասանյանն ասաց, որ իր չընտրվելու դեպքում իրենց պայքարը կշարունակվի: «Մենք արդեն մինիմում խնդիրները կատարել են այս պահի դրությամբ, և Ղարաբաղը զարթոնք է ապրելու»,- ասաց նա՝ հավելելով, որ չընտրվելու դեպքում կհայտարարի ընդդիմության գործունեության մասին: