Տեխասում մահապատժի են ենթարկել 33-ամյա մի տղամարդու, որը դատապարտվել էր 1998 թվականին սպանություն և կողոպուտ իրականացնելու մեղադրանքներով: Այս մասին տեղեկացնում է BBC-ն:
Յոկամոն Հիրնը դարձել է տեխասցի առաջին բանտարկյալը, որին մահապատժի են ենթարկել մահացու ներարկման միջոցով: Դեղանյութը կազմված է միայն մեկ բաղադրիչից` պենտոբարբիտալից:
Հիրնի մահվան մասին հայտարարվել է ներարկումից 25 րոպե անց:
Անցած շաբաթ մահապատիժների իրականացման Տեխասի վարչությունը կասեցրել է 1982 թվականից գործող մահապատժի իրականացման կարգը. այն ժամանակ դա կատարվում էր 3 դեղանյութերի ներարկմամբ, քանի որ ԱՄՆ-ում լրացել է մահացու դեղանյութերի բաղադրիչներից մեկի արտադրության լիցենզիայի ժամկետը:
Նախկինում մահապատժի նոր մեթոդը կիրառում էին Օհայո, Արիզոնա, Այդահո և Վաշինգտոն նահանգներում:
