Հուլիսի 17-ին արտակարգ դեպք է տեղի ունեցել Լոռու մարզում: Ինչպես տեղեկացնում է News.armeniatv.com-ը, հղում կատարելով ֆոտոլրագրող Գագիկ Շամշյանին, ժամը 18.15-ի սահմաններում Ալավերդու բժշկական կենտրոնից Ոստիկանության Թումանյանի բաժին են ահազանգել այն մասին, որ իրենց մոտ են տեղափոխվել Լոռու մարզի Թեղուտ գյուղի բնակիչ 27-ամյա Ռոմիկ Բոզինյանը և Ալավերդի քաղաքի բնակիչ` 25-ամյա Արտակ Գաբրիելյանը: Երիտասարդներն աշխատում են «Թեղուտ» ՓԲԸ-ում. Ռ. Բոզինյանը՝ որպես տրակտորիստ, իսկ Ա. Գաբրիելյանը՝ որպես զոդող-բանվոր:
Պարզվել է, որ ժամը 16.30-ի սահմաններում Ռ. Բոզինյանը վարելով «Թեղուտ» ՓԲԸ-ին պատկանող «Պ-40» մակնիշի տրակտորը` Շնող-Թեղուտ 1-ին կմ-ում կամրջի վրայով անցնելիս դուրս է եկել ճանապարհի երթևեկելի հատվածից և ընկել Թեղուտ գետը: Վթարի հետևանքով վարորդը և ուղևոր Ա. Գաբրիելյանը ստացել են մարմնական վնասվածքներ և տեղափոխվել Ալավերդու բժշկական կենտրոն:
Դեպքի վայր են մեկնել Ոստիկանության Թումանյանի բաժնի օպերատիվ խումբը, Ճանապարհային ոստիկանության 2-րդ սպայական գումարտակի 5-րդ վաշտի աշխատակիցները՝ վաշտի հրամանատարի տեղակալ Մարտուն Բալայանի և նույն վաշտի երկրորդ դասակի հրամանատար Սմբատ Նորեկյանի, ՃՈ հետաքննիչ Մխիթար Գիշյանի գլխավորությամբ:
Դեպքի վայրում քննչական աշխատանքները ղեկավարել է Ոստիկանության քննչական գլխավոր վարչության Լոռու մարզի քննչական բաժնի Թումանյանի քննչական բաժանմունքի քննիչ Դավիթ Դավթյանը:
Փաստի առթիվ Թումանյանի քննչական բաժանմունքում նյութեր են նախապատրաստվում:
