Ադրբեջանի արտգործնախարար Էլմար Մամեդյարովի այն հայտարարությունը, թե ԵԱՀԿ Մինսկի խմբի 20-ամյա միջնորդական առաքելությունն ապարդյուն է անցել, կարելի է որակել որպես անհեթեթ (աբսուրդ) և անբարոյական հայտարարություն: «Առաջին լրատվական»-ի հետ զրույցում նման տեսակետ հայտնեց ԼՂՀ նախագահի խորհրդական Դավիթ Բաբայանը:
«Այս 20 տարիների ընթացքում Մինսկի խումբն իր գործունեությամբ իրականացրել է ամենակարևոր առաքելությունը՝ պահպանել տարածաշրջանային խաղաղությունն ու կայունությունը: Եթե չլիներ ԵԱՀԿ Մինսկի խումբը, 1994 թվականին Ադրբեջանի վիճակը բոլորովին այլ կլիներ: Նա, որպես անկախ պետություն, նույնիսկ կարող էր չգոյատևել: 94-ին ադրբեջանական բանակը լրիվ քայքայված էր, այն լքել էր երկրի արևմտյան մասերը: Մենք կարող էինք առանց նույնիսկ մի կրակոց արձակելու վերցնել Կիրովաբադն ու մնացած քաղաքները: Բայց Մինսկի խումբը միջամտեց և կանգնեցրեց պատերազմը»,- հիշեցրեց Դավիթ Բաբայանը:
Հիշեցնենք, որ ԱԳ նախարար Էլմար Մամեդյարովը APA լրատվական գործակալությանը տված հարցազրույցում, անդրադառնալով ԵԱՀԿ Մինսկի խմբի գործունեությանը, դժգոհել էր, նշելով, որ ՄԽ 20-ամյա միջնորդական առաքելությունն ապարդյուն է անցել:
Էլմար Մամեդյարովը քննադատել է նաև ստատուս քվոյի իրավիճակը: Նա մասնավորապես ասել է, թե ստատուս քվոյի պահպանումը կարող է տարածաշրջանում հանգեցնել «անորոշության շարունակության, անկանխատեսելիության և վտանգավորության»:
