Չինաստանը Կոլումբիայի հետ բանակցություններ է վարում մի այնպիսի երկաթգիծ կառուցելու համար, որը կարող է Ատլանտյան և Խաղաղ օվկիանոսները միացնող Պանամայի ջրանցքին այլընտրանք դառնալ: Այս մասին գրում է The Financial Times-ը:
Ենթադրվում է, որ երկաթգիծը կանցնի Կոլումբիայի խաղաղօվկիանոսյան ափերից մինչև Կարիբյան ծովի ափին գտնվող Կարտախենի մոտ նոր կառուցվող քաղաքը: Երկաթգծի երկարությունը մոտ 220 կմ է, իսկ ծրագրի արժեքի մասին տեղեկություններ չեն հաղորդվում:
Կոլումբիայի նախագահ Խուան Մանուել Սանտոսի խոսքով` այս ծրագիրը «իմաստ ունի»: Նա հավելել է, որ Ասիան «համաշխարհային տնտեսության նոր շարժիչն է»: Ըստ թերթի՝ կոլումբիական կողմը հույս ունի Պանամայի ջրանցքին այլընտրանք հանդիսացող այս երկաթգիծի կառուցումով արագացնել ԱՄՆ իշխանությունների կողմից Կոլումբիայի և ԱՄՆ-ի ազատ առևտրի համաձայնագրի հաստատման գործընթացը:
Մոտ 80 կմ երկարությամբ Պանամայի ջրանցքի շինարարությունը սկսվել է 1904 թ., իսկ պաշտոնական բացումը տեղի է ունեցել 1920 թ.: Մինչև 1999 թ. ջրանցքը կառավարում էր ԱՄՆ-ն, իսկ 1999 թ. դրա կառավարումը հանձնվեց Պանամայի իշխանություններին: Ամեն տարի այս ջրանցքով մոտավորապես 14 հազար նավ է անցնում: Մի քանի տարի առաջ որոշվեց լայնացնել ջրանցքը` կառուցելով երկրորդ ճանապարհը գերխոշոր նավերի համար:
