Այսօր՝ հուլիսի 16-ին, Ոստիկանության քրեական հետախուզության վարչության և նույն վարչության 2-րդ վարչության աշխատակիցները՝ գլխավոր վարչության պետ Աշոտ Կարապետյանի, 2-րդ վարչության պետ Ալիկ Մարգարյանի, ինչպես նաև Ոստիկանության Երևան քաղաքի վարչության և Ոստիկանության Շենգավիթի բաժնի աշխատակիցների հետ Երևանի Ոստիկանապետ Ներսես Նազարյանի, Երևանի ոստիկանապետի օպերգծով տեղակալ Աշոտ Միրիջանյանի և Շենգավիթի բաժնի պետի օպերգծով տեղակալ Արտակ Պողոսյանի գլխավորությամբ ձեռնաշղթայված վիճակում մի քաղաքացու բերել են Շենգավիթ վարչական շրջանի Խարբերդի ամառանոցների 24 փողոց 3-րդ տուն:
Ֆոտոլրագրող Գագիկ Շամշյանը News.armeniatv.com-ին հայտնել է,որ ձեռնաշղթայով բերված անձը Շենգավիթ վարչական շրջանի բնակիչ 51-ամյա Սամվել Գասպարյանն է:
Գ. Շամշյանը հայտնել է, որ Ոստիկանության երեկ ձեռնարկած օպերատիվ գործողությունների արդյունքում սպանություն կատարելու կասկածանքով նրան բերման էին ենթարկել: Ս. Գասպարյանը օպերատիվ-քննչական խմբին մատնացույց է արել նշված տան նկուղային հարկում եղած երկաթե տակառը, որի մեջ նա տեղադրել է իր կողմից սպանվածի դին:
Ոստիկանության քննչական գլխավոր վարչության Երևանի քննչական վարչության Շենգավիթի քննչական բաժնի քննիչները՝ քննչական բաժնի պետ Մինաս Հակոբյանի գլխավորությամբ փորձաքրեագետի հետ բացել են տակառը, որը մի քանի տեսակի կպչուն ժապավեններով փաթաթած էր, ինչպես նաև բոլտով ու պնդօղակով (գայկա) ձգած:
Այն բացելուց հետո տակառի մեջ հայտնաբերվեց նրա կողմից սպանվածի դին: Գ. Շամշյանը հայտնել է, որ սպանվածը Երևանի Մանանդյան փողոցի բնակիչ թոշակառու 76-ամյա Գոհարիկ Գասպարյանն էր:
Ըստ Շամշյանի տեղեկությունների, սպանությունը կատարվել է Ս. Գասպարյանի տանը, երբ Գ. Գասպարյանին նա խաբել և կանչել է իր բնակարան՝ նրան ունեցած պարտքը վերադարձնելու պատրվակով:
Սպանելուց և դին մասնատելուց հետո այն տեղափոխել է Խարբերդի 24 փողոցի նշված տուն և մարմինը տեղավորել տակառում:
Սպանություն կատարողը, ով ըստ Շամշյանի տեղեկությունների, նախկինում մի քանի անգամ դատապարտված է եղել, նշված տան այգում նախօրոք փորել էր փոս, որպեսզի երկաթե տակառը տեղադրի փոսում և հողով ծածկի:
Փաստի առթիվ Ոստիկանության Շենգավիթի քննչական բաժնում հարուցվել է քրեական գործ ՀՀ Քրեական օրենսգրքի 104 հոդվածի 1-ին մասի (սպանություն) հատկանիշներով:
Ֆոտոլրագրողը հայտնել է, որ նշված տունը մարդասպանը վարձակալական հիմունքներով էր վերցրել:
Գ. Շամշյանը հայտնել է, որ սպանվածը հուլիսի 9-ից որպես անհայտ կորած Ոստիկանության Շենգավիթի բաժնի կողմից փնտրվում էր, իսկ հարազատները նրան փնտրում էին հուլիսի 2-ից:
