Հուլիսի 19-ին Լեռնային Ղարաբաղի Հանրապետությունում անցկացվելիք նախագահական ընտրությունների համար ընթացող ընտրապայքարն անհավասար դիրքերից է իրականացվում: «Առաջին լրատվական»-ի հետ զրույցում նման տեսակետ հայտնեց ԼՂՀ նախկին արտգործնախարար Արման Մելիքյանը:
Ըստ նրա՝ նախագահի թեկնածու Վիտալի Բալասանյանը թեև ԱԺ պատգամավոր է եղել, բայց հատուկ քաղաքական գործունեությամբ չի զբաղվել: Այս առումով նա նոր քաղաքական դեմք է, որը որոշակի ամբիցիաներ ունի նաև Ղարաբաղում ստեղծված իրավիճակը փոխելու տեսանկյունից: Մյուս կողմից՝ գործող նախագահ Բակո Սահակյանն ավելի փորձառու է: «Դրան գումարած Բակո Սահակյանի կողքին է Արցախի ամբողջ վարչական ապարատը, որը բավականին լուրջ ուժ է, մանավանդ Արցախի պայմաններում: Այսինքն՝ ընտրապայքարում ուժերի հավասարություն չի նկատվում»,- ասաց նա:
Միաժամանակ Արման Մելիքյանը նշեց, որ մեծ հաշվով ԼՂՀ իշխանության թեկնածուն ավելի վատ վիճակում է, որովհետև իշխանության սխալները, երկրում առկա կաշառակերությունը և մյուս խնդիրները ընտրողների համար տեսանելի են: «Մյուս կողմից՝ ես չեմ կարող վստահաբար պնդել, որ պարոն Բալասանյանը կկարողանա ընտրողների այդ դժգոհ զանգվածին ուղղորդել իր կողմ: Ժամանակը ցույց կտա, չնայած շատ քիչ օրեր են մնացել ընտրությանը: Դատելով իրավիճակից՝ գործող իշխանության նկատմամբ համակրանքը մեծ չէ, սակայն նաև դեռևս չեմ տեսնում, որ ընդդիմադիր թեկնածուն կարողացել է ընտրողների մեծամասնության համակրանքը շահել: Դեռևս չկողմնորոշված մարդկանց կարծիքն էլ է այստեղ կարևոր լինելու»,- ընդգծեց նա:
Արման Մելիքյանի խոսքով՝ նախորդ նախագահական ընտրությունների ժամանակ, երբ ընդդիմության թեկնածուն Մասիս Մայիլյանն էր, ընդդիմադիր ճամբարն ավելի աշխույժ էր, քան հիմա: Սակայն, չնայած դրան, ընդդիմության թեկնածուն ընդամենը ձայների 10 տոկոսը հավաքեց: «Ես չեմ կարող վստահաբար ասել, որ Արցախում ընտրությունների անցկացման մեխանիզմն էապես տարբերվում է Հայաստանում անցկացվող ընտրություններից: Այստեղ խնդիրը բազմաշերտ է: Ամեն ինչ կախված է նրանից, թե ով կշահի ընտրողների համակրանքը, թե որքանով ընտրությունները կկեղծվեն, որքանով ընտրողը կփորձի մասնակցել ընտրությանը»,- նշեց նա:
Հիշեցնենք, որ ԼՂՀ նախագահի ընտրություններում պայքարում են 3 թեկնածուներ՝ Բակո Սահակյանը, Վիտալի Բալասանյանը և Արկադի Սողոմոնյանը:
