ՀՀԿ ԱԺ պատգամավոր Հովհաննես Սահակյանը մեզ հետ զրույցում, արձագանքելով Ադրբեջանի պաշտպանության նախարար Սաֆար Աբիևի այն հայտարարությանը, որը արել էր Մինսկի խմբի համանախագահների հետ հանդիպմանը` նշելով, թե Ադրբեջանը լրջորեն պատրաստվում է իր հողերի դեօկուպացիային, և որ նման իրավիճակում ցանկացած պետություն նույն կերպ կվարվեր, ավելին ոչ ոք չի կարող մեղադրել Ադրբեջանին այս հարցում, ասաց.
«Մեզ համար պարզ է, որ ադրբեջանական կողմը հասկանալու հետ լուրջ պրոբլեմ ունի։ 1994թ.-ի հրադադարից այս կողմ իրենք չհասկացան, որ մեզ հետ ուժի, հաթաթա տալու դիրքերից չի կարելի խոսել։ Եվ ընդհանրապես ուժեղ մարդիկ գործում են, այլ ոչ թե հայտարարություններ են անում։
Ի տարբերություն ադրբեջանական հրոսակախմբերի, մենք պաշտպանում ենք մեր հողը, մեր պապերի գերեզմանները և ապագա ծնվող երեխաների համար այն բնականոն միջավայրը , որտեղ մեր երեխաները պետք է ապրեն, զարգանան և շենացնեն մեր երկիրը։
Դա եթե իրենց համար իրենց իշխանությունը պահելու խնդիր է, որ մենք այսպես կանենք, այնպես կանենք, որպեսզի ալիևական դինաստիայի շարունակականությունը ապահովենք, դա Ղարաբաղի ժողովրդի և մեր համար կենսական խնդիր է»։
Նա նաև ավելացրեց, որ 21-րդ դարում սկսվող պատերազմը չի լինելու որսորդական հրացաններով կամ «ռագատկաների» կռիվ։
«Նոր պատերազմում կորուստները լինելու են անչափ և աննկարագրելի, և նրանք էլ լավ գիտեն, որ մեր բանակը շատ ավելի մարտունակ է, քան երեկ էր կամ տարիներ առաջ։ Ավելին, լավ գիտեն, որ մեր հոգին, մեր կամքը, մեր դուխը այսօր շատ ավելի բարձր են, քան առաջ։
Պարզապես մենք հաղթող կողմ ենք և ուժեղ դիրքերից ենք միշտ խոսում, նման հայտարարություններին անլուրջ ենք վերաբերվում»,- Ադրբեջանի ռազմատենչ հայտարարություններին արձագանքեց Հովհաննես Սահակյանը։