Ռումինիայի նախագահ Տրայան Բեսեսկուն հայտարարել է, որ կհեռանա քաղաքականությունից, եթե հուլիսի 29-ին տեղի ունենալիք հանրաքվեի ժամանակ ընտրողները համաձայնեն իմփիչմենթին: Այս մասին հաղորդել է ITAR-TASS-ը:
«Ես մտադիր չեմ մնալ քաղաքականության մեջ և չեմ առաջադրվի նախագահի պաշտոնի համար: Ես ունեմ մասնագիտություն և երբեք չեմ բաժանվել նավի կապիտանի մասնագիտությունից: Հինգ տարին մեկ անցել եմ կուրսեր: Եվ եթե որոշում կայացնեմ, հույս ունեմ, որ մինչև թոշակի անցնելը կկանգնեմ կապիտանի կամրջակի վրա»,- լրագրողներին ասել է Բեսեսկուն:
Նախագահը նաև ընդունել է, որ այժմ ժողովրդականություն չի վայելում:
Նախօրեին ռումինական խորհրդարանը ձայների մեծամասնությամբ երկրի նախագահ Տրայան Բեսեսկուին հեռացրել է պաշտոնից:
Հիշեցնենք, որ սոցիալ-լիբերալ կուսակցությունը նախագահին մեղադրել է վարչապետի իրավասությունները «սեփականաշնորհելու» համար, ինչի հետևանքով 2010-ին միանձնյա որոշում է կայացրել կրճատելու բյուջետային ծախսերը։
Բեսեսկուն դա որակում է անօրինական գործընթաց` հերքելով բոլոր մեղադրանքները:
