Ռիգայում ոստիկանությունը տուգանել է բազմաբնակարան շենքում բնակվող ընտանիքին: Բանն այն է, որ ընտանիքի երեխան դաշնամուր է նվագել: Տուգանքի չափը կազմում է 101 լատ (180 դոլար): Այս մասին հաղորդում է Lenta.ru-ն:
Աղմուկի պատճառով ոստիկանությանը գանգատվել է ընտանիքի թոշակառու հարևանը: Ի դեպ, նա բողոք է ներկայացրել երկու անգամ: Առաջինը ստացվել էր մարտի կեսերին: Այդ ժամանակ երիտասարդ երաժշտի ծնողները տուգանվել էին 1 լատով, սակայն հիմա կրկնակի խախտման պատճառով տուգանքի չափը մեծացել է:
Տղայի ծնողները վիճարկել են որոշումը Հասարակական կարգի, անվտանգության և կոռուպցիայի դեմ պայքարի հանձնաժողովում: Նրանք հայտնել են, որ իրենց որդին արդեն 8 տարի է՝ սովորում է երաժշտական դպրոցում և պետք է տանը պարապի: Ի դեպ, երեխան նվագել է միայն ցերեկային ժամերին:
Ոստիկանությունը խոստացել է վերանայել որոշումը:
