Ադրբեջանական Trend լրատվական գործակալության փոխանցմամբ՝ Ադրբեջանի նախագահ Իլհամ Ալիևը Եվրոպական խորհրդի նախագահ Հերման Վան Ռոմպեյի հետ համատեղ մամուլի ասուլիսի ժամանակ խոսել է Եվրոպայի էներգաանվտանգության համար Ադրբեջանի դերակատարությունից.
«Այսօր ադրբեջանական նավթը կազմում է ԵՄ-ի անդամ մի շարք երկրների էներգահավասարակաշռության համարյա 30 տոկոսը: Ադրբեջանը տարածաշրջանի հիմնական էներգետիկ նախագծերի նախաձեռնողն է: Հենց մենք ենք առաջինը բացել էներգետիկ միջանցքը՝ եվրոպական ու համաշխարհային շուկաներ Կասպիցի ածխաջրածնային պաշարների փոխադրումը ապահովելու համար:
Դա նշանակում է, որ մենք ապահովում ենք մեր եվրոպական գործընկերների էներգաանվտանգությունը: Ադրբեջանի նավթային ոլորտի զարգացման պոտենցիալը շատ բարձր է, և մենք ունենք մի շարք նավթամուղներ:
Ադրբեջանն արդեն իսկ վերածվել է նաև գազի խոշոր արտահանողի: Մենք բացել ենք նոր գազահանքեր, սակայն հիմնական գազահանքերը Շահ Դենիզը, Ումիդը և Ապշերոնն են: Ադրբեջանի ապացուցված գազային պաշարները կազմում են 2.6 տրիլիոն խորանարդ մետր:
Մենք նաև դիվերսիֆիկացնում ենք գազատրանսպորտային ցանցը, և այդ պլանում ոչ վաղ անցյալում Թուրքիայի հետ ստորագրեցինք TANAP գազատարի նախագծի պատմական համաձայնագիրը: Այդ գազատարում Ադրբեջանի մասնաբաժինը կազմելու է 80 տոկոս»:
