Անցած ուրբաթ և կիրակի ԱՄՆ արևելյան ափին պատուհասած երկու ուժգին փոթորիկների հետևանքով զոհվածների թիվը հասել է 27-ի: Ոստիկանության տվյալներով` ամենից շատ տուժել է Վիրջինիա նահանգը: Փոթորկի հետևանքով մահվան դեպքերից 13-ը գրանցվել են այնտեղ: Մյուս զոհերը գրանցվել են Նյու Ջերսի, Օհայո, Մերիլենդ, Հյուսիսային Կարոլինա նահանգներում:
Վիրջինիայի նահանգապետ Ռոբերտ Մակդոնելը հայտարարել է, որ մինչ օրս շարունակում են առանց էլեկտրաէներգիայի մնալ 100 հազար սպառողներ: Հաղորդվում է, որ էլեկտրամատակարարումը կվերականգնվի մի քանի օրից: Փոթորկի հետևանքով տապալված ծառերը շարունակում են փակ պահել 50 ճանապարհներ, արգելափակված են 45 բնակավայրեր, որտեղ արտակարգ դրության ռեժիմը շարունակվում է: Այս մասին հաղորդում է Itar-Tass-ը:
ԱՄՆ արևելյան ափի տուժած շրջաններում առանց էլեկտրաէներգիայի է մնացել 600 հազար մարդ: Վերը նշված նահանգներից բացի` խոսքը վերաբերում է նաև մայրաքաղաք Վաշինգտոնին:
Իրավիճակը բարդացնում է շոգ եղանակը: Վերջին օրերին միայն Մերիլենդում շոգից 8 մարդ է մահացել: Օդերևութաբանների կանխատեսումներով` ջերմաստիճանը կնվազի միայն հաջորդ շաբաթվա վերջին, իսկ մինչ այդ հնարավոր է` նոր ռեկորդաին ցուցանիշների հասնի:
