Ադրբեջանի նախագահի աշխատակազմի հասարակական-քաղաքական հարցերի վարչության պետ Ալի Հասանովը, անդրադառնալով երեկ Աստրախանում կայացած Հայաստանի, Ադրբեջանի եւ Ռուսաստանի ղեկավարների հանդիպմանը, դրական է գնահատել ռազմագերիների փոխանակման եւ դիակների վերադարձման վերաբերյալ ձեռք բերված պայմանավորվածությունը։ Ըստ Trend գործակալության, անդրադառնալով Հայաստանի խորհրդարանում Լեռնային Ղարաբաղի ճանաչման հնարավորություններին, Ա.Հասանովը հայտարարել է. «Եթե Հայաստանի խորհրդարանը ընդունի ԼՂ-ի ճանաչման կամ ԼՂ-ն Հայաստանին միացնելու վերաբերյալ օրինագիծ, դա մեկ անգամ եւս կվկայի այն մասին, որ ղարաբաղյան հակամարտությունը ոչ էթնիկ, այլ անջատողական ռեժիմի ձեռքի գործն է, եւ որ հակամարտող կողմ հանդես է գալիս Հայաստանի կառավարությունը: Այդ դեպքում Ադրբեջանը միջազգային ասպարեզում հանդես կգա՝ այդ փաստի հետ հաշվի նստելով»: