Հյուսիսատլանտյան դաշինքի գլխավոր քարտուղար Անդերս Ֆոգ Ռասմուսենը նոյեմբերի 5-ին կժամանի Մոսկվա, որի ընթացքում կքննարկվեն Աֆղանստանում փոխգործակցության եւ Եվրոպայում հակահրթիռային համակարգի տեղադրման խնդիրների հետ կապված հարցեր: Հանդիպումը նախորդելու է Ռուսաստան-ՆԱՏՕ գագաթնաժողովին, որը կայանալու է նոյեմբերի 19-ին:
Վերջին շրջանում Ռուսաստանի եւ Հյուսիսատլանտյան դաշինքի միջեւ սկսել են գործընթացներ, որոնց արդյունքում կողմերը փորձում են փոխգործակցության եզրեր գտնել: Երեկ հայտնել ենք, որ Ռուսաստանը փաստաթուղթ է ներկայացրել ՆԱՏՕ, որով իր տեսլականն է ներկայացրել` կապված Հյուսիսատլանտյան դաշինքի անդամ նոր երկրներում զորամիավորումների տեղակայման վերաբերյալ:
ՆԱՏՕ-ի ներկայացուցիչ Ջեյմս Ապպատուրայի խոսքերով, կքննարկվեն մի խումբ հարցեր, որոնցից ամենակարեւորը Աֆղանստանում ՆԱՏՕ-ի զորամիավորումների համար մատակարարումների իրականացնումն է Ռուսաստանի տարածքով, ինչպես նաեւ Ռասմուսենի խնդրանքը` ռուսական 21 ուղղաթիռ տրամադրել աֆղանական զինված ուժերին` նրանց հետագա ուսուցմամբ: