Ադրբեջանական Turan լրատվական գործակալության փոխանցմամբ՝ ԵԽԽՎ-ի Մարդու իրավունքների ու իրավական հարցերի հանձնաժողովը հավանության է արժանացրել այն բանաձևի նախագիծը, որը կազմվել է ԵԽԽՎ-ի (ավելի վաղ՝ միայն Ադրբեջանի) քաղբանտարկյալների գծով զեկուցող, գերմանացի պատգամավոր Քրիստոֆ Շտրասերի պատրաստած համապատասխան զեկույցի հիման վրա:
Հանձնաժողովի նիստը փակ է եղել մամուլի ներկայացուցիչների համար, ինչի համար էլ մանրամասները դեռ հայտնի չեն: ԵԽԽՎ-ում ադրբեջանական պատվիրակության ղեկավար Սամեդ Սեիդովը հայտնել է, որ բանաձևի նախագծին կողմ է քվեարկել 26 մարդ, իսկ դեմ՝ 22-ը: Այն ներկայացվելու է ԵԽԽՎ-ի աշնանային նստաշրջանի դիտարկմանը:
Սեիդովի խոսքերով՝ այդ զեկույցը պատրաստվել է ոչ թե զուտ Ադրբեջանի, այլ՝ ընդհանրապես քաղբանտարկյալների խնդրի վերաբերյալ: Սեիդովը, սակայն, չի բացատրել, թե ինչու են ադրբեջանցիները դեմ քվեարկել դրան, եթե այդ զեկույցը չի վերաբերում իրենց:
Հիշեցնենք, որ Շտրասերն Ադրբեջանի քաղբանտարկյալների գծով ԵԽԽՎ զեկուցող է նշանակվել 2009 թվականի մարտին։ Սակայն նա ոչ մի անգամ չի այցելել Ադրբեջան, քանի որ ադրբեջանական կողմը շարունակ մերժում է նրան անցագիր տրամադրել՝ պնդելով, թե իր երկրում «չկան» քաղբանտարկյալներ։
Վերջին շրջանում Շտրասերի մանդատը փոփոխության է ենթարկվել. նա Ադրբեջանի քաղբանտարկյալների զեկուցողից վերածվել է ԵԽԽՎ քաղբանտարկյալների զեկուցողի, ինչը, սակայն, նույնպես չի ներգործել ադրբեջանական իշխանությունների վրա։
Դրանից հետո Շտրասերը հայտարարել էր, որ ընդհանրապես հրաժարվում է Ադրբեջան այցելելուց և այդ երկրի քաղբանտարկյալների մասին զեկույցը պատրաստելու է առանց Ադրբեջան այցելելու՝ հենվելով տեղեկատվական տարբեր աղբյուրների վրա:
