Արարատի մարզի Մասիս քաղաքում երեկ 15.30-ի սահմաններում տեղի ունեցած սահմռկեցուցիչ սպանությունը ապշեցրել է ոչ միայն Սահակյանների ընտանիքի ծանոթ հարազատներին, այլև ողջ Մասիսին: Քաղաքի բնակիչ, 74-ամյա Վոլոդյա Սահակյանը Մասիս քաղաքի 8-րդ փողոցի 32 հասցեում գտնվող իր տանը իր մոտ եղած դանակով երկու անգամ հարվածել էր հարսի՝ 37-ամյա Քրիստինե Զաքարյանի որովայնին, ինչի արդյունքում 4 երեխաների մայրը մահացել էր: Սակայն սպանությունը կատարելուց հետո 74-ամյա սկեսրայրը մեկ այլ դանակով էլ իր կոկորդն էր կտրել:
Ըստ «Առաջին լրատվական»-ի ունեցած տեղեկությունների՝ սկեսրայրը 37-ամյա հարսին սպանել է խանդի հողի վրա: Բանն այն է, որ Քրիստինեի ամուսինը, այսինքն` Վոլոդյա Սահակյանի որդին, արդեն 6 տարի է, ինչ մահացել է: Վերջին շրջանում հարսով լուրջ հետաքրքրվող է եղել, որը ցանկացել է ամուսնանալ Քրիստինեի հետ և հայրություն անել նրա 4 երեխաներին` 18 և 15 տարեկան տղաներին, 14 և 12 տարեկան աղջիկներին: Սկեսրայրը, սակայն, խիստ դեմ է եղել այս հանգամանքին, մի քանի օր շարունակ վիճել են, և խնդրի լուծումը, փաստորեն, սկեսրայրը գտել է սպանության մեջ, այնուհետ էլ ինքնասպան եղել:
Մեր ունեցած տեղեկություններով՝ Վոլոդյա Սահակյանը որևէ հոգեկան խնդիր չի ունեցել:
Նշենք, որ ինչպես ավելի վաղ հայտնել էր Գագիկ Շամշյանը` հարսին սպանելուց առաջ Վլ. Սահակյանը դռան մուտքի մոտ տեղադրված թախտին պառկած է եղել, իսկ հարսը լվացքը փռելուց է եղել հողամասում: Այդ ժամանակ Վլ. Սահակյանը հարձակվել է հարսի վրա և դաշույնատիպ ինքնաշեն դանակով երկու անգամ հարվածել: Եվ երբ տանեցիները աղմուկի վրա մոտեցել են նրանց, Վլ. Սահակյանը եկել և նստել է հողամասում տեղադրված բազկաթոռին: Մինչ տանեցիները փորձում են օգնություն ցուցաբերել արնաքամ եղող հարսին, սկեսրայրը կոշկակարի դանակով կտրում է իր կոկորդը:
Ոստիկանները տանը հայտնաբերել են արյունոտված 2 դանակ, որոնք առգրավվել են: Ըստ նախնական տեղեկությունների՝ դանակներից մեկով սկեսրայրը սպանել է հարսին, իսկ մյուսով՝ կտրել իր կոկորդը:
Ստեղծվել է օպերատիվ խումբ՝ ոստիկանության Արարատի մարզային վարչության պետ Արսեն Աբրահամյանի գլխավորությամբ: Փաստի առթիվ ոստիկանության քննչական գլխավոր վարչության Արարատի մարզի քննչական բաժնի Մասիսի քննչական բաժանմունքում հարուցվել է քրեական գործ՝ ՀՀ Քր.օր.-ի 104 հոդվածի 1-ին մասի հատկանիշներով: Ոստիկանության լրատվական ծառայությունից «Առաջին լրատվական»-ին փոխանցեցին, որ նախաքննություն է ընթանում:
