Թուրքիայի նախագահ Աբդուլլահ Գյուլը պետական հեռուստաալիքի եթերում մեկնաբանել է սիրիական հակաօդային պաշտպանության ուժերի կողմից խփված կործանիչի հետ տեղի ունեցած դեպքը:
Քաղաքական գործիչն ընդգծել է, որ Թուրքիան չի կարող անտեսել իր հարևանի գործողությունները ու դրա հետ կապված` կառավարությանն անհրաժեշտ է ձեռք առնել բոլոր անհրաժեշտ միջոցառումները: Այս մասին հայտնում է Reuters-ը:
«Հնարավոր չէ աչք փակել կատարվածի վրա, և մեզանից կախված հնարավոր ամեն բան կանենք դրա համար»,- ասել է Գյուլը: Նա ընդգծել է, որ Թուրքիայի ռազմաօդային ուժերին պատկանող կործանիչի թռիչքը տեղի է ունեցել ամենօրյա պարեկային հսկողություն իրականացնելու շրջանակում: Ըստ Գյուլի՝ հիմա գլխավորն այն հարցն է, թե ում օդային տարածքում է զենիթային հրթիռը խոցել ինքնաթիռը:
Գյուլը հայտնել է, որ Անկարայի ու Դամասկոսի միջև պարբերաբար տեղի են ունենում հեռախոսային խոսակցություններ: Երկու կողմերն էլ որոնում են օդաչուներին ու խփված ինքնաթիռի բեկորները:
Թուրքական ռազմաօդային ուժերի հսկողություն իրականացնող ծառայությունը կորցրել էր F-4 ինքնաթիռի հետ ռադիոկապը, երբ այն մոտ է գտնվել սիրիական ջրային տարածքներին:
