Գերմանիայի նախագահ Յոահիմ Գաուկը հրաժարվել է ստորագրել Եվրոպական կայունացման մեխանիզմ ստեղծելու պայմանագիրը և ԵՄ-ում բյուջետային կարգուկանոնը խստացնելու համաձայնագիրը, գրում է Frankfurter Allgemeine Zeitung-ը : Այս մասին նախագահին խնդրել էր Գերմանիայի դաշնային սահմանադրական դատարանը: Իշխող կոալիցիան, որը դժվարությամբ է ընդդիմության հետ համաձայնության եկել փաստաթղթերի ընդունման շուրջ, հույս ուներ, որ երկու փաստաթուղթն էլ հունիսի 29-ին կվավերացվեն բունդեսթագի կողմից:
«Ձախերի» նախագահի տեղակալ Սարա Վագենքնեխտի խոսքերով՝ նախագահի որոշումը «ապտակ» էր կանցլեր Անգելա Մերկելին: Նրա կարծիքով սահմանադրական դատարանը կարող է օգտվել այդ ձգձգումներից՝ բյուջետային կարգուկանոնի մասին պայմանագիրն ամբողջությամբ անօրինական ճանաչելու համար: Ընդդիմության կարծիքով՝ դա սահմանափակում է խորհրդարանի և ազգային կառավարության իրավունքները: «Ձախերը» դա համարում են սահմանադրության փոփոխություն, ուստի կոչ են անում հանրաքվե անցկացնել:
Սոցիալ դեմոկրատների խորհրդարանական խմբակցության փոխնախագահ Հուբերտուս Հայլը հայտատարել է, որ կառավարությունը շատ է ձգձգել բանակցություններն ընդդիմության հետ, ուստի կասկածներ են առաջանում՝ կապված պայմանագրերի սահմանադրական լինելու հետ: Առայժմ նախարարները պետք է ամենակարճ ժամկետում ապացուցեն, որ նոր համաձայնագրերը չեն հակասում Գերմանիայի սահմանադրությանը:
Կայունացման եվրոպական մեխանիզմն ուղղված է ճգնաժամի դեմ պայքարին: Գոյություն ունեցող պայմանագիրը համաձայնեցվել է եվրոգոտու երկրների կողմից դեռ 2011թ. փետրվարին, իսկ հետո ընդունվել է Գերմանիայի կառավարության կողմից: Պայմանավորվածությունների համաձայն՝ 2012թ. Գերմանիան պետք է հիմնադրամում ներդնի 8.7 մլրդ եվրո:
