Հոմսից վիրավորների տարհանման Կարմիր խաչի ծրագիրը տապալվեց. կան ռեկորդային թվով զոհեր

Կարմիր խաչի աշխատակիցները երեկ հայտարարել են, որ տուժած քաղաքացիներին Հոմս քաղաքից դուրս բերելու իրենց ծրագրերը տապալվել են, քանի որ զինված բախումները չեն դադարում։ Այս մասին հաղորդում է Reuters գործակալությունը։

Կարմիր Խաչի ներկայացուցիչների խոսքերով՝ հինգշաբթի առավոտյան իրենց հաջողվել էր համաձայնության գալ կառավարական ուժերի և ապստամբների միջև կրակի դադարեցման և Հոմսից վիրավորների դուրսբերման վերաբերյալ։ Սակայն ավելի ուշ կազմակերպության ներկայացուցիչների ուղղությամբ կրակ էր բացվել, և նրանք ստիպված էին եղել դադարեցնել օպերացիան։

Ինչպես հաղորդում է France Presse գործակալությունը՝ երեկ Սիրիայում գրանցվել են 2012թ.-ի ապրիլի 12-ից մեկնարկած խաղաղ կարգավորման ծրագրի իրագործումից հետո ամենամեծ թվով զոհեր։ Նշվում է 104 խաղաղ բնակչի, 10 ապստամբի և կառավարական ուժերի 54 ներկայացուցչի մահվան մասին։