Մոտ 7 ժամ է պահանջվել ֆրանսիական ոստիկանությանը, որպեսզի ազատագրի չորս գերիների, ովքեր այսօր առավոտյան առևանգվել էին Թուլուզի բանկերից մեկում, որն իր բնակչությամբ Ֆրանսիայի 4-րդ մեծ քաղաքն է: Շենքի գրոհի ժամանակ, որը տևել է մի քանի վայրկյան, հանցագործը վիրավորվել և ձերբակալվել է: Ինչպես գրում է Itar-Tass-ը, գերեվարվածներից ոչ ոք չի տուժել,:
CIC ֆրանսիական բանկ չարագործը մուտք է գործել տեղական ժամանակով մոտ ժամը 10:00-ին և իրեն անվանել է «Բումազա»: Իրավապահ մարմինների տվյալներով՝ գողություն անելու ձախողված փորձից հետո հանցագործը գերի է վերցրել 4 մարդու, այդ թվում՝ բանկի մասնաճյուղի տնօրենին: Դեպքի վայր են ժամանել ոստիկանության աշխատակիցները: Նրանք շրջափակել են այդ թաղամասը և կապ են հաստատել հանցագործի հետ:
26-ամյա տղամարդը հայտարարել է, որ հանդիսանում է «Ալ-Կաիդա»–ի ահաբեկչական խմբավորման անդամ և պահանջել է, որ իր հետ բանակցեն հատուկ նշանակության ոստիկանության էլիտար ստորաբաժանման` ՌԵՅԴի աշխատակիցները:
Ինչպես հաղորդել է Թուլուզի դատախազ Միշել Վալեն, «մարդկանց գերի վերցրած երիտասարդը, ում անձը հաստատվել է, հստակեցրել է, որ իրեն փող հարկավոր չէ, և որ իրեն առաջ են մղում կրոնական դրդապատճառները»:
Ավելի ուշ Վալեն հայտարարել է, որ հանցագործը զինված է եղել ռետինե փամփուշտներով կրակող տրավմատիկ հրացանով:
Հատուկ օպերացիան սկսվել է տեղի ժամանակով 17:00-ին, երբ հանցագործը փորձել է շենքից դուրս գալ` թաքնվելով գերիներից մեկի հետևում: Հատուկ նշանակության մարտիկները կրակ են բացել և վիրավորել «Բումազայի» ոտքը: Նա տեղափոխվել է հիվանդանոց, նրա կյանքին վտանգ չի սպառնում:
Հաղորդվում է, որ չարագործը հոգեկան շեղում ունի:
