Կենտրոնական կլինիկական զինվորական հոսպիտալում շարունակում է ծայրահեղ ծանր մնալ «Հարսնաքար» ռեստորանային համալիրում դաժան ծեծի ենթարկված, Կենտրոնական կլինիկական զինվորական հոսպիտալի ԼՈՌ բաժանմունքի ղեկավար, 35-ամյա մայոր Վահե Ավետյանի վիճակը: Այս մասին «Առաջին լրատվական»-ին հայտնեց Կենտրոնական կլինիկական զինվորական հոսպիտալից մի բժշկուհի: Նա ասաց, որ երեկ չէ առաջին օրվա գիշերը Վահե Ավետյանը վիրահատվել է: Բժշկուհու խոսքով՝ ինչպես երեկ, այսօր ևս սպասողական վիճակ է:
«Արդեն բժշկական միջամտության խնդիր չկա, սպասում ենք՝ օրգանիզմը հաղթահարի: Միակ հույսն Աստված է»,- ասաց Կենտրոնական կլինիկական զինվորական հոսպիտալի բժշկուհին: Նշենք, որ դաժան ծեծի արդյունքում Վահե Ավետյանի մոտ առաջացել էր ուղեղի հեմատոմա, ինչի արդյունքում գլխուղեղի մի կիսագնդի մի մասը տեղափոխվել է մյուս կիսագնդի մեջ: Վիրահատությունը կատարած բժիշկը` նեյրովիրաբուժական բաժանմունքի պետ Արման Հակոբյանը, որը Ավետյանի հետ նույն հոսպիտալում էր աշխատել, ավելի վաղ ասել էր, որ վիրահատությամբ փորձել են կանխել ուղեղի շարունակվող այտուցումը:
Հիշեցնենք, որ հունիսի 17-ին ԱԺ ՀՀԿ-ական պատգամավոր Ռուբեն Հայրապետյանին պատկանող «Հարսնաքար» ռեստորանային համալիրում անվտանգության աշխատակիցները դաժան ծեծի էին ենթարկել զինվորական հոսպիտալի նեյրովիրաբուժության բաժանմունքի միկրովիրաբույժ Արտակ Բայադյանին, Կենտրոնական կլինիկական զինվորական հոսպիտալի ԼՈՌ բաժանմունքի ղեկավար, մայոր Վահե Ավետյանին և կլինիկական օրդինատոր, ավագ լեյտենանտ Գարիկ Սողոմոնյանին:
Միջադեպի առնչությամբ հարուցվել է քրեական գործ։ Երեկ ձերբակալվել է «Հարսնաքարի» անվտանգության աշխատակից Գարիկ Մարգարյանը, իսկ ռեստորանային համալիրի աշխատակիցներից ոմանց հարցաքննել էին: Երեկ նաև հայտարարությամբ հանդես եկավ ԱԺ ՀՀԿ-ական պատգամավոր Ռուբեն Հայրապետյանը՝ անթույլատրելի և արդարացում չունեցող համարելով տեղի ունեցած միջադեպը: «Ժամանակին իմ կողմից հիմնադրված և այսօր իմ ընտանիքին պատկանող բիզնես կառույցների կառավարումը, որտեղ աշխատում են հարյուրավոր մարդիկ, իմ անմիջական պարտականությունը չէ, և անթույլատրելի է այդ կառույցներում կատարվող ցանկացած բան վերագրել ինձ»,- նշել էր Ռուբեն Հայրապետյանը:
