Ադրբեջանական 1news.az-ի փոխանցմամբ՝ Ադրբեջանի ԱԳՆ-ի պաշտոնական ներկայացուցիչ Էլման Աբդուլաևը մեկնաբանել է ԵԱՀԿ Մինսկի խմբի համանախագահող երկրների նախագահների արած հայտարարությունը, որում խոսք է գնում խաղաղ ճանապարհով Ղարաբաղյան հակամարտության կարգավորման մասին.
«Իրենց հայտարարությունում համանախագահող երկրները ցույց տվեցին ուժի կիրառման անթույլատրելիությունը: Ադրբեջանը, ԵԱՀԿ Մինսկի խմբի համանախագահող երկրները և միջազգային հանրությունն ընդհանուր առմամբ համակարծիք են Ղարաբաղյան հակամարտության կարգավորման հարցում:
Միջնորդներն ընդգծում են ստատուս-քվոյի պահպանման անընդունելիությունը, ինչը նույնպես համապատասխանում է Ադրբեջանի դիրքորոշմանը: Խաղաղության հասնելու համար անհրաժեշտ է կամք ցուցաբերել: Հակամարտության կարգավորման արհեստական ձգձգումը բացասաբար է անդրադառնում ողջ տարածաշրջանի զարգացման և դրանում բնակվող ժողովուրդների հետագա ճակատագրերի վրա:
Ղարաբաղյան հակամարտությունը գլխավոր զսպիչ գործոնն է, որ Հայաստանին հեռու է պահում տարածաշրջանային նախագծերից: Բաքվի դիրքորոշումն անփոփոխ է հակամարտության կարգավորման հարցում. հայկական զորքերը պետք է դուրս բերվեն ադրբեջանական տարածքներից: Դրանից հետո կդադարի շփման գծում միջադեպերի գրանցումը»:
