Ինֆրակարմիր տեսախցիկը Կալիֆոռնիայում ֆիքսել է ամերիկյան խորհրդավոր տիեզերանավի վայրէջքի պահը: X-37B-ը վայրէջք է կատարել Կալիֆոռնիայում շաբաթ՝ վաղ առավոտյան: Ինչպես նշում է The Daily Mail-ը, ԱՄՆ օդուժի անօդաչու տիեզերանավը 15 ամիս է՝ ուղեծրում է, սակայն դրա առաքելության մասին ոչինչ հայտնի չէ: Տիեզերանավը երկրի շուրջ պտտվում է 17 կմ/ժամ արագությամբ և ըստ տեղեկությունների՝ պետք է վայրէջք կատարեր դեկտեմբերին: Ռոբոտ օդանավի առաքելությունն անհայտ պատճառներով հետաձգվել է:
Այն վայրէջք է կատարել Կալիֆոռնիայում՝ Vandenberg օդուժի բազայում (գտնվում է Լոս Անջելեսից 130 մղոն հյուսիս- արևմուտք), գաղտնի փորձնական թռիչք իրականացնելուց հետո: Ինչպես երևում է՝օդանավի «քիթն» ու «որովայնը» վառ նարնջագույն են դարձել՝ մթնոլորտի հետ շփման հետևանքով շիկանալուց: Այն տիեզերանավ է, սակայն նրա վայրէջքը նման է օդանավի:
Սա ԱՄՆ օդուժի երկրորդ նախագիծն է: Առաջինն իրականացվել էր 2010-ին: Տիեզերական օդանավը Vandenberg-ում վայրէջք էր կատարել տիեզերքում մնալուց 24 օր հետո:
Տիեզերանավը, որն ունի 8,9 մետր երկարություն, լիցքավորվում է արևային էներգիայով: Օդուժը չի բացահայտել տիեզերանավի առաքելությունը, սակայն հայտնի է, որ շուտով տիեզերք կուղարկվի երրորդ տիեզերանավը:
Boeing Phantom Works-ի ստեղծած տիեզերանավերի փորձարկումները լայն մասշտաբով բնութագրվում են որպես առեղվածային, մինչդեռ բացատրվում է, թե ծրագիրը վերցվել է ՆԱՍԱ-ից՝ պարզելու, թե բազմակի թռիչքների համար որքան արագ և էժան է հնարավոր վերականգնել տիեզերանավերը:
Անցած մայիսին ոչ պրոֆեսիոնալ աստղագետները նկատել էին, որ տիեզերանավը թռչում է Հյուսիսային Կորեայի, Իրաքի, Իրանի, Պակիստանի և Աֆղանստանի վրայով: Կասկածներ էին առաջացել առ այն, որ դա օգտագործվում է լրտեսական նպատակներով:
