Պետությանը պետք է աղանդավորական համաժողովներն անհանգստացնեն: Այս մասին «Առաջին լրատվական»-ի հետ զրույցում ասաց Տեր Նիկողոս քահանա Հովհաննիսյանը` խոսելով վերջին օրերին շրջանառվող լուրերի մասին, թե մորմոնները համաժողով են անցկացնելու Հայաստանում:
Քահանայի խոսքով` ցանկացած աղանդավորական կազմակերպության գործունեությունը, համաժողովները անհանգստացնում է հայ եկեղեցուն, ամեն ինչով վնասում է հայ եկեղեցուն և մասնավորապես հայոց պետությանը, հայկական պետականությանը: Ըստ նրա` դրա պատճառն այն է, որ աղանդավորական կազմակերպությունը երբևիցե չի մտածում որևէ մեկի հոգու փրկության մասին, որովհետև աղանդավորական կազմակերպության հիմնական դրույթները, հիմնական իմաստը շարժումներում մարդկանց ներգրավելն է, դեպի իրենց տանելը:
«Հիմնականում այնտեղ զոմբիացման պրոցես է գնում: Դա կլինի մորմոնների համաժողով, եհովայի վկաների համաժողով, դա կլինի «Կյանքի խոսք»-ի համաժողով՝ միանշանակ անհանգստացնում է եկեղեցուն: Մենք բոլորս, իբրև հայ քրիստոնյա, բոլորս էլ անհանգստացած պետք է լինենք, բայց դա արդեն հիմնականում պետության խնդիրն է, որովհետև դրսից եկած քարոզիչները խարխլում են պետության հիմքերը»,- ասաց Տեր Նիկողոս քահանա Հովհաննիսյանը` հավելելով, որ Հայ Առաքելական եկեղեցին հնարավոր բոլոր ձևերով պայքարում է, բայց եթե աղանդը գրանցված է որպես աղանդավորական կազմակերպություն արդեն որևէ բան անելն անհնար է:
