Հունիսի խորհրդարանական ընտրություններից առաջ թուրքական քաղաքական ուժերը առաջարկություններ են արել Թուրքիայի հայկական համայնքի ներկայացուցիչներին` ընդգրկվել նախընտարական ցուցակների մեջ որպես պատգամավորության թեկնածուներ: Այս մասին հայտարարել է Արև Ջեբեջին, որը ներկայացնում է Ժողովրդահանրապետական կուսակցությունը.
«Ես հայ եմ, բայց նաև մեկ ընդհանուրի մի մասը: Եթե ես խորհրդարան մտնեմ, իհարկե, ես իմ համայնքի խնդիրները կբարձրացնեմ այնտեղ: Բայց կցանկանամ ներկայացնել ամբողջ երկիրը նույնպես»,- ասել է Արև Ջեբեջին, որը հայ համայնքի ներկայացուցիչ է:
«Սա որոշակի փորձություն է: Ես ուզում եմ, որ որոշ մարդիկ կատարեն իրենց խոստումները»,- ասել է Ջեբեջին: Այս պահին հայտնի է, որ պատգամավորության թեկնածու է գրանցվել 7 հայ, որոնցից 6-ը` կուսակցական ցուցակներով, մեկը՝ որպես անկախ թեկնածու: «Մեր ընտանիքները միշտ մեզ վախեցրել են (մասնակցելու երկրի քաղաքական կյանքին .- 1in.am): Նրանք չեն ցանկացել, որ մենք լինենք առաջին գծում: Մենք միշտ վարել ենք պասսիվ կյանք»,- նշել է Արև Ջեբեջին:
Ջեբեջին նաև ասել է, որ շրջադարձային է եղել 2007 թ., երբ սպանվել է Հրանտ Դինքը. «Սպանությունից հետո, հայերի մի մասն ավելի լուռ դարձավ` հավատացած լինելով, որ եթե չլռեն, կսպանվեն: Իսկ մի ավելի մեծ խումբ սկսեց պաշտպանել իր շահերը»,- ասել է Ջեբեջին:
Սակայն թերթը նշում է, թե միշտ չէ, որ հայկական համայնքի և Ժողովրդահանրապետական կուսակցության հարաբերությունները լավ են եղել: 2009 թ. այս կուսակցության պատգամավորներից մեկը հայտարարությամբ է հանդես եկել` մեղադրելով նախագահ Գյուլին հայկական արմատներ ունենալու մեջ: