Ֆինլանդիայի արտաքին առևտրի ու Եվրամիության նախարար Ալեքսանդր Ստուբը երեկ հայտարարել էր, որ երկրում չկան գաղտնի ծրագրեր` ՆԱՏՕ ընդգրկվելու կամ Ռուսաստանի հետ ռազմական հակամարտության վերաբերյալ:
Այդ եղանակով նա մեկնաբանել էր ՌԴ ռազմաօդային գլխավոր շտաբի ղեկավար Նիկոլայ Մակարովի հայտարարությունը, ով ավելի վաղ անհանգստություն էր հայտնել դաշինքի` Ֆինլանդիայում անցկացվող զորավարժությունների, ինչպես նաև Վրաստանի հետ համագործակցության առնչությամբ: Այս մասին հայտնում է Interfax-ը:
«Տարբեր մակարդակներով շտապեցինք հիշեցնել, որ Ֆինլանդիան չի պատրաստվում դառնալ ՆԱՏՕ-ի անդամ և որ Ֆինլանդիան ռազմական համագործակցություն չի պատրաստվում իրականացնել Վրաստանի հետ: Համաձան իշխող միության ծրագրի`Ֆինլանդիան համագործակցում է ՆԱՏՕ-ի հետ ու իր համար բաց է պահում ՆԱՏՕ-ին անդամակցության հնարավորությունը:
Ֆինլանդիայում անցկացվող ռազմական զորավարժությունների ընթացքում պահեստային զինծառայողները գործողությունների են մասնակցում խոշոր միավորումների կազմում: Դա հրաշալի օրինակ է, թե ինչպես է մեր պահուստային բանակը գործում»,- հայտարարել է ֆինն նախարարը էստոնական Postimees-ում հրապարակված հոդվածում:
Նրա խոսքով` Ֆինլանդիայի անվտանգության քաղաքականության մեջ չկա գործունեության ոչ մի գաղտնի ծրագիր:
«Սակայն, պարզվում է, որ Ռուսաստանի կարծիքով, դրանք առկա են: Գեներալն իր խոսքում մի քանի ենթադրություն է արել, մեկը մյուսից ավելի տարօրինակ: Նա անգամ ենթադրել է, որ սպասվում է քաղաքական կուրսի փոփոխություն ավելի կոշտ ուղղությամբ, որը, բացի Ֆինլանդիայից՝ կանդրադառնա Եվրոպայի ու ԱՄՆ-ի վրա»,- ասել է Ստուբը:
Նախարարն ընգդգծել է, որ Ֆինլանդիայի նպատակը լավ ու բարիդրացիական հարաբերություններ հաստատելն է Ռուսաստանի հետ:
«Ռուսաստանի մուտքը Առևտրի համաշխարհային կազմակերպություն նրան կվերածի ավելի գրավիչ գործընկերոջ` ինչպես Ֆինլանդիայի, այնպես էլ Եվրամիության համար»,- կարծում է Ստուբը:
Հիշեցնենք, որ մայիսի 5-ին ելույթ ունենալով Հելսինկիում՝ Մակարովը հայտարարել էր, որ ՆԱՏՕ-ի հետ Ֆինլանդիայի համագործակցությունը պոտենցիալ վտանգ է ներկայացնում Ռուսաստանի համար ու ցանկացել էր, որ ռազմական ոլոտում երկիրն ավելի սերտ հարաբերություններ հաստատի Ռուսաստանի հետ:
