«Այն տնօրենները, ում դպրոցներում կաշառակերությունը չի դադարի, չեն աշխատելու: Այն տնօրենները, ովքեր չեն ապահովի պետության կողմից սահմանված չափանիշներին համապատասխան կրթություն, նույնպես չեն աշխատելու»,- ավագ դպրոցերի տնօրենների հետ հանդիպման ժամանակ զգուշացրեց Արմեն Աշոտյանը:
Ավագ դպրոցներ բացելու գործընթացը սկսել է 2006թ.-ին` հանրակրթական դպրոցի վկայականները աշխարհում ճանաչելի դարձնելու նպատակով: «Այդ ժամանակից ի վեր վերանորոգվել են դպրոցներ, լաբորատորիաներ, գնվել են համակարգիչներ: Պետությունը գնել է միայն գերժամանակակից տեխնիկա, որպեսզի հետագայում խնդիրներ չառաջանան»,- ասում է կրթության ու գիտության նախարար Արմեն Աշոտյանն ու տեղեկացնում, որ այս տարի նախատեսվում է 65-130 մլն հատկացնել դպրոցների վերանորոգման համար:
Աշոտյանը խոստացավ ուշադրություն դարձնել ավագ դասարաններում հաճախումներին: «Բոլորս գիտենք, որ ավագ դասարաններում երեխաները, մեղմ ասած, վատ են հաճախում և պարապում են կրկնուսույցների մոտ` ընդունելության քննությունների պատրաստվելու համար»,-ասում է Աշոտյանը: Ըստ նրա` նման բանն անթույլատրելի է: «Քաղաքը փոքր է, ինձ էլ վստահում են, եթե ինձ տեղեկացնեն, որ որևէ աշակերտ պայմանավորվածություն ունի տնօրենի հետ ու նորմալ չի հաճախում, ապա այդ տնօրենը կհեռացվի աշխատանքից:
Նախարարը զգուշացրեց նաև, որ թույլատրելի չէ դրամահավաքությունը դպրոցում: «Եթե շարունակվեն վարագույրի փող հավաքել ավագ դպրոցում, ստիպված կլինեն այլևս չաշխատել:
Մարզերում ավագ դպրոցների մասին «Առաջին լրատվականի» հարցին Աշոտյանը պատասխանեց. «Մարզերում մենք չենք բացում ավագ դպրոցներ: Միայն այն դեպքում ենք դա անում, եթե համայնքից մեզ դիմում են այդ խնդրանքով: Այսպես 3 ավագ դպրոց բացել ենք Գեղարքունիքում»:
«Նախկինում ատեստավորում անցած ուսուցիչների սերտիֆիկատները ունեն բարոյական ուժ, բայց ոչ իրավական արժեք»,- ասում է նախարարը: Ուսուցիչների որակավորման նոր քննությունները սկսելու են արդեն այս ամիս:
